Aaron Dagang agi dikirai PRS bediri ba penuduk Kanowit. - Berita Iban Online

Header Ads

  • Baru Nyadi

    Aaron Dagang agi dikirai PRS bediri ba penuduk Kanowit.

    BEJADI : Masing (tiga kanan) ‘mangkung tiang’ seraya dikemataka Alexander (dua kanan), Aaron (muak kanan Masing) enggau bala bukai.

    KANOWIT: Parti Rakyat Sarawak (PRS) deka ngirai penyandang sitak Kanowit, Datuk Aaron Ago Dagang nyadi chalun ba penuduk parlimen nya maya Pengawa Bepilih Besai Ke-14 (PRU14) tu.

    Presiden iya, Tan Sri Datuk Amar Dr James Jemut Masing madah iya udah nanya Kaban Kunsil Nengeri (ADUN) Machan, Allan Siden Gramong enggau ADUN Ngemah Alexander Vincent senentang pekara nya.

    Machan enggau Ngemah iya nya penuduk di baruh pegai Kanowit.

    Ku iya, kededua ADUN udah mantaika sukung sida ngagai Aaron dipilih baru nyadi chalun parti nya maya pengawa bepilih.

    Nya alai, badu agi ngiga ke bukai laban ari PRS, nadai chalun ke bukai ungkup Kanowit kelimpah Aaron.

    “Ukai ketegal aku dekaka iya nyadi chalun tang ketegal dua iku ADUN udah nyadaka sukung ngagai Aaron. Nyadi Presiden parti, aku deka nitihka nama ti dipinta sida,” ku iya lebuh bejadika pengawa Mangkung Tiang enggau bejadika sistem Tagang ungkup Serakup Peranak Pang Junan (PJPA) di Nanga Pang, Ulu Sungai Ngemah ditu, kena Hari Enam.

    Sekeda bala ke bisi datai nyengkaum Aaron, Alexander, Chairman PJPA Entili Garaji enggau patron PJPA Penghulu Ambrose Pengiran Sampai.

    Masing ke mega Sapit Kepala Menteri enggau Menteri Pemansang Infrastruktur enggau Perengka Pengangkut madahka iya deka ngaga pengawa ke sama ba penuduk parlimen PRS ke bukai ke alai iya deka dulu agi nanya ADUN sebedau mantaika nama chalun.

    Ku iya, semua chalun PRS ti udah dibantaika nyentuk diatu nerima sukung ari ADUN ba penuduk parlimen sida empu.

    Bisi enam penuduk sitak parlimen dipenggi PRS iya nya Sri Aman, Julau, Kanowit, Ulu Rajang, Lubok Antu enggau Selangau.

    Naka diatu, Masing udah ngemendarka nama chalun ungkup Julau (Datuk Joseph Salang), Sri Aman (Datuk Masir Kujat), Ulu Rajang (Datuk Wilson Ugak Kumbong) lalu pemadu baru Kanowit (Aaron).

    Berindik ari nya, semina chalun ungkup Lubok Antu enggau Selangau aja apin dibantai.

    Ba lansa bukai, Aaron penggal ketiga nyadi MP Kanowit kenyah ari PRU 2004 ke alai iya menang ngarika Barisan Nasional (BN) enggau majoriti 2,057 undi bepadan nengali nalan ngelaban chalun ngatika diri Frederick Bunsu Janton.

    Iya menang di datai rambau PRU dalam taun 2008.

    Ba pengawa bepilih 2013, iya menang enggau majoriti 3,042 undi, tiga penjuru ngelaban Thomas Laja Besi ari Parti Keadilan Rakyat (PKR) enggau Ellison Ludan Muyan ari Sarawak Workers Party (SWP).

    Aaron teulihka 8,046 undi seraya Laja enggau Ludan bulih 5,004 enggau 417 undi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads