Anang nangi berubah ke pemaik pengidup. - Berita Iban Online

Header Ads

  • Baru Nyadi

    Anang nangi berubah ke pemaik pengidup.

    NGATUR PEMANSANG : (ari kiba) Leong Wai Kiong, Masing enggau Dato Wong Kuo Hue benung berandau seraya beratika kar tanah ti engkeman endur nanam sawit ti ngaul menua Batang Rajang.

    KAPIT: Sapit Kepala Menteri Sarawak, Tan Sri Datuk Amar Dr James Jemut Masing ke mega Kaban Kunsil Nengeri (ADUN) Baleh minta pengempu tanah Adat Bansa Asal (NCR) ngubah gaya idup diri.

    Bisi dua pekara ti pemadu dikenangika bansa Iban. Enti sema nanam sawit ba tanah nya, dini endur sida deka bumai lalu baka ni sida ulih ngidupka diri.

    “Mayuh orang udah nyapai pemujur dalam pengidup laban nerima pemansang sereta ngubah gaya idup sida. Enti enda, bala kita deka jauh tinggal di belakang,” ku Masing rambau bejadika Pengawa Nanam Keterubah Sawit Projek Pemansang Tanah Hak Adat Bumiputra (HAB) Batang Rajang/Batang Baleh, Kapit – Tan Ann Pelita Baleh Sdn Bhd.

    Ku Masing, Tan Ann datai kitu laban deka ngemansangka tanah ba rega chukup tinggi. Pengawa tu nelan belanja RM8,000 dikena ngemansangka tanah sehektar pemesai.

    “Naka diatu, bisi 700 hektar tanah udah disungkur lalu sida (Ta Ann) melanja RM5.6 juta. Berapa iku kitai ditu bisi duit dikena ngemansangka iya. Nyema sida (Ta Ann) enda datai kitu mai pemansang ngagai kitai. Nya alai, kitai (pengempu tanah NCR) patut nyukung pengawa tu.

    “Sebagi ari tanah kita ulih dikemansang, lalu sebagi ari kita ulih nunda aku, nyulut nengah pelajar.

    Kita tau nganjung bala anak besekula. Tu pekara ti chukup beguna, meseti ditunda sereta bisi pengeransing.

    “Lempaika pengandal kita ngagai kami ke nyadi ketuai kita di menua tu laban nadai orang bukai agi ulih dikeandal ngemansangka kita,” ku Masing nerang.

    Pekara kedua ku Masing, iya ulih mantu ngemansangka tanah tang iya enda nyamin. Nya alai, nadai penanggul tanah diambi laban tanah kita deka dikemansang di baruh nama kita empu lalu pala tanah deka diberi ngagai kita.

    Ketiga ku iya, kita dibayar gawa merimba tanah diri. Nyema kita enggai gawa, nya tepulai ngagai kita empu. Tang enti kita gawa, pengudah kita nerima dividen ari tanah diri empu, merimba tanah diri lalu dibayar gaji.

    Masing ngelalau pengempu tanah NCR ngambika ngemansang tanah sida nengah pengawa begulai nentuka bisi nilai tambah ba tanah sida.

    Iya mega bisi ngerintai mayuh penguntung lebuh tanah NCR dikemansang, bisi sambung jalai, nukar tanah bisi mansutka asil, tanah bisi nilai tambah, mansutka penatai pemisi enggau nyaga pengempu tanah ngena dokumen ti patut.

    Ku iya nerang, pengawa kunsi (JVC), pemeranak puku ti dituku – Ta Ann Plantation Sdn Bhd, pengempu tanah enggau Pelita Holdings Sdn Bhd. Tanah NCR deka dikemansang nanam sawit di menua Batang Baleh enggau Batang Rajang, Kapit, mungkur 11,178 hektar pemesai, ti ngaul 68 buah rumah panjai.

    Penyampau kesemua bayar panjar manggai RM921, 292.80.

    Masing madah, pekara ti beguna iya nya, tanah nadai mansutka sebarang asil ngelama tu deka dikemansang enggau sawit lalu semua orang deka teulihka penguntung.

    “Kitai minta sida datai kitu, ngemansangka tanah, ukai nyual tanah. Tu keterubah di pelilih Kapit.

    Dikearap rumah panjai ke bukai deka nyempulang pengawa kitai tu.

    “Aku nyamin, pengawa tu ngemai penguntung lalu anang bisi penangi ba sebarang pengawa pemansang,” tandu Masing.

    Ekuiti rakan kunsi, Ta Ann Plantation Sdn Bhd (60 peratus), pengempu tanah (30 peratus) enggau Pelita Holdings Sdn Bhd (10 peratus).

    Kandang menua kena bungkur projek tu di Batang Rajang enggau Batang Baleh, mungkur 11, 178 hektar pemesai tanah NCR sereta 14, 452 hektar tanah nengeri.

    Dipelaba pemesai kandang menua deka ditanam sawit 6706 hektar pemesai tauka 60 peratus ari pemesai tanah NCR. Bisi 68 buah rumah panjai ti ngaul 1360 ruang bilik enggau 6800 pengempu tanah.

    Kaban Parlimen (MP) Ulu Rajang Datuk Wilson Ugak Kumbong, ADUN Pelagus Jefferson Jamit Unyat, Residen Kapit Joseph Belayong, Pemesai Pelilih Kapit Elvis Didit, Pemesai Pelilih Bukit Mabong Douglas Pungga sereta bala ketuai opis perintah ke bukai bela datai ngulu pengawa sehari nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads