Anang ngachau projek ngaga jalai ke Ng Ngungun - Ng Semujan. - Berita Iban Online

Header Ads

  • Baru Nyadi

    Anang ngachau projek ngaga jalai ke Ng Ngungun - Ng Semujan.

    KELAI BEJADI: Masing nyain plak lebuh bejadi Sistem Tagang seraya (ari kiba) seraya dikemata Aaron, Entili, Donny, Pengiran (kanan) enggau Alexander (dua kanan).

    KANOWIT: Peranak di menua tu udah dilalau ngambika anang nguji ngachau pengawa ngaga Jalai Nanga Ngungun/Nanga Jagau/Nanga Semujan lebuh projek nya datai ba tikas dipejalai ila.

    Sapit Kepala Menteri Sarawak Tan Sri Dr James Jemut Masing madah batang tuju projek nya dikena nyediaka sambung jalai ngagai peranak asal Ulu Sungai Ngemah ti deka mulaika diri ngagai menua asal sida empu.

    “Jalai tu ukai digaga ngambika orang bukai ulih ngereja kayu batang ba kandang menua nya. Enti udah bisi jalai, sida ti asal ari Ulu Sungai Ngemah ulih pulai ngagai menua asal ke udah ninggalka tanah enggau pesaka bukai ngelama tu.

    “Peranak menua nya empu deka napi penusah nyema projek tu tejanggal ketegal sebarang pengawa ngachau ari ke digaga,” ku iya lebuh bejadika pengawa Mangkung Tiang sereta ngelancharka sistem Tagang ungkup Serakup Peranak Pang Junan (PJPA) kena Hari Lima nyin tadi.

    Pengawa tu udah diatur ba Nanga Pang di Ulu Sungai Ngemah ditu, urung lapan jam pejalai nepan perau panjai, lebuh ai jelan iya pemesai, ari pasar Kanowit.

    Masing, ke mega Menteri Pemansang Infrastruktur enggau Perengka Pengangkut madah,Menteri Besai Datuk Seri Najib Tun Razak ngemendarka belanja sepenyampau RM50 juta dikena ngaga jalai lebuh ke nemuai ngagai Nanga Ngungun dalam bulan Mac taun nyin tadi, dikena malas pemanah peranak dia ti udah meri awak ngagai menua maya penyelawai kominis dalam taun 1970an.

    Sida ti udah dipindah ngagai palan pengentap baru iya nya di Nanga Jagau enggau Nanga Ngungun di Kanowit sereta Nanga Sekuau di Selangau pengudah diasuh mindah ninggalka rumah panjai enggau tanah sida maya nya.

    “Aku madah ngagai menteri besai nyema peranak dia enda meri peluang, iya enggau aku nadai bediri ditu baka sehari tu laban ketuai rayat enggau Barisan Nasional (BN) enda deka nyadi perintah kemaya hari.

    “Aku madahka iya, apai iya niang Tun Razak ti mindahka peranak nya suba. Diatu kitai udah nyapai pengelikun lalu enggau kuasa ba jari iya nyadi menteri besai, udah datai ba gintir iya mai sida nya pulai ngagai menua asal,” ku Masing ngelansa.

    Ku iya, Jalai Nanga Ngungun/Nanga Jagau/Nanga Semujan enda kurang ari 30km lalu iya deka nyadi jalai standard R1 lalu deka digaga ari baruh program Jiwa Murni raban soldadu.

    Iya melabaka ungkus jalai nya deka manggai RM15 juta per km nyema jalai standard R3 digaga Opis Kereja Raya (JKR) ti beungkus RM500 juta.

    “Aku sekali agi nandu, madah ngagai menteri besai, nyema sida tu enda dipindah, perintah deka melanja urung RM2 ngagai RM3 bilion dikena ngelaban kominis.

    “Aku nemu penyampau RM50 juta tu enda chukup. Taja pia, nyema BN sekali agi menang ba pengawa bepilih ti deka datai, kitai ulih ngagihka belanja dikena ngaga jalai ngambika meruan agi,” ku iya.

    Sama bisi datai Kaban Parlimen (MP) Kanowit Datuk Aaron Ago Dagang, Kaban Kunsil Nengeri (ADUN) Ngemah Alexander Vincent, Chairman PJPA Entili Garaji, patron PJPA Penghulu Ambrose Pengiran Sampai, Ketuai Polis Kanowit DSP Daniel Benjamin, Ketuai Opis Pemadah Kanowit Donny Minggu Ling sereta Koordinator Opis Pekara Khas (JASA) Ngemah, Jelani Ajang. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads