Apai indai meseti matau ulah anak dikena nentuka pemujur sida. - Berita Iban Online

Header Ads

  • Baru Nyadi

    Apai indai meseti matau ulah anak dikena nentuka pemujur sida.

    SIBU: Apai indai meseti semampai beratika ulah anak sida ukai semina ba sekula primari aja tang patut dikemeratka agi maya sida belabuh angkat bujang dara.

    Dayak Think-Tank Group (DTTG) mantaika penemu tu ketegal ngasaika diri bela siruka bansa Dayak lebih agi ba pekara nyeliah bala nembiak ari ke ngereja pengawa enda menuku.

    “Kitai enda ngenggai bisi bala anak baka sida ke baru angkat bujang dara nyalam ke pengawa diri ari ke ditemu apai indai.

    “Nya alai kitai apai indai tau berundingka chara bakani nyidi ulah ke dikereja bala anak ari belakang baka lengkas mansik cherita orang bukai ti bisi nyebut anak kitai ngereja pengawa ke enda manah,” pia ku pengari raban nya ti mega Ketuai Raban Indu DTTG Miri Christina Kelit.

    Ku iya, bisi mega apai indai ngembuan penemu enda pechaya ke jaku orang bukai laban andal ke anak diri orang ti mereti sereta mendingka jaku.

    Iya madah, taja pan baka nya, enda salah alai apai indai mansik jaku nya nangika amat tauka ngemetulka jaku sebubu ngapa.

    Christina mansutka penemu tu ketegal bisi dedinga berita madahka nembiak indu maya hari tu malut diri ngereja pengawa ke enda menuku nyentuk bisi salah singkang alah dibai orang bukai ke ambi ulih ba sida.

    Tu nyengkaum nembiak indu ke baru berangkat diri dara ti datai ari ruang bilik ke seranta ngujungka enda besekula agi.

    “Taja tu nyangka berita ngerimbas pending aja tang kitai apai indai anang enda betatika ulah anak kitai.

    “Ambika banding ulah sida ngenyit nyelai tauka nyau bisi duit kediri tang enda temu ari ni penatai duit nya.

    “Manah kitai ngadang dulu enggai ke nesal dudi hari,” ku iya madah baru.

    Ku iya, nembiak ke beumur 11 tauka 13 nyentuk 17 taun, nembiak ke benung ba renggat umur ti deka mutarka identiti diri, enda rindu dikemata belama sereta ransing deka ngiga belanja diri empu.

    “Chara sida berunding mega udah berinsur, landik ningkah jaku lalu bisi maya nemu nempa penyarut tauka belaya diri sebilik.

    “Ba pekara tu, apai indai meseti landik baka mendingka penemu anak dulu,” pia ku iya.

    Christina madah, nyema bisi penyarut nyadi dalam bilik baka apai indai sarak, tu tau ngeruga runding anak.

    “Ari nya, apai indai nyengkaum bala pengajar anang enggai berandau enggau nembiak nama bisi tetemuka ulah sida nyelai lalu anang ngelakka sida majak ngembuan ulah enda manah nyentuk pelajar sida enda mujur ngujungka tau ngereja pengawa enda menuku,” ku iya madah baru.

    Kelimpah ari nya, iya nerang, apai indai enda tau mantupka pengeringat sida ngagai bala anak laban tu mega sebagi ari ulah ti tau ngubah runding nembiak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads