BNBBC madahka penemu PH semina propaganda politik. - Berita Iban Online

Header Ads

  • Baru Nyadi

    BNBBC madahka penemu PH semina propaganda politik.

    MIRI: Kelab Barisan Nasional Backbenchers (BNBBC) Sarawak madahka manifesto tumu ti dibantaika Pakatan Harapan (PH) di nengeri tu kena Hari Minggu tu tadi besibil ari pekara ti endang nyadi sereta mega sejarah.

    Chairman BNBBC Paulus Palu Gumbang madah, pekara ti nyata betingkah iya nya rikod ex-Menteri Besai ke mega Chairman PH, Tun Dr Mahathir Mohammad, ti nyadi menteri besai pengelama 22 taun lalu udah nya nyadi penyanding penemu ba Perbadanan Minyak Negara lebuh pinchin dataika iya diganti Menteri Besai Datuk Seri Najib Razak.

    “Lebuh kami minta royalti minyak ditiki ari lima ngagai 20 peratus, iya ke nyadi penyanding penemu Petronas, tang nama kebuah iya enda meri penemu ngagai perintah besai ngambika nyukung peminta kitai,” ku iya nanya.

    Paulus belalauka peminta Sarawak deka nikika penyampau royalti ba asil minyak enggau gis ti diketuai Kepala Menteri, Niang Datuk Patinggi Adenan Satem ngagai perintah besai diketuaika Najib.

    Dr Mahathir, ke mega Chairman PPBM, diripot mansutka jaku ti madahka ‘jari iya ditanchang’ ba Petroleum Development Act (PDA) ti dilangkar sereta dikemendar sebedau iya dipadu nyadi menteri besai, nya kebuah iya enda ulih ngaga sebarang pengawa ba pekara belanja enggau royalti minyak ti deka diberi ngagai Sarawak.

    Ku Paulus, pekara nya enda nyamai didinga lebuh Dr Mahathir, ke nyadi menteri besai pengelama 22 taun, ngetuaika perintah enggau dua pertiga majoriti dalam parlimen, datai enggau manifesto pengawa bepilih sereta semaya ti ulih digaga rambau iya megai kuasa.

    Iya mega alit ati enggau penerang ari Dr Mahathir senentang Sempekat Malaysia 1963 (MA63), ti madahka semina 16 pekara aja ungkup Sarawak.

    “BNBBC nanya MA63 ti disebut iya (Dr Mahathir), laban dalam sempekat seruran bisi 18 pekara, lalu iya semina nyebut 16 pekara aja,” ku Paulus.

    Kelab nya besetuju enggau penemu Sapit Kepala Menteri enggau Sapit Presiden PBB Datuk Amar Douglas Uggah Anak Embas ke alai PH semina deka ngulihka undi ari manifesto ti dibantaika sida bedau lama ke udah.

    Ku Paulus, manifesto nya mayuh agi pasal ritorik penyakal dikena nginti undi maya pengawa bepilih besai tu ila.

    Chairman PH Sarawak Chong Chieng Jen, ti macha manifesto rambau pengawa bejalai bebala mayuh ‘New Deal, New Hope’ PH di BDC Kuching kena Hari Minggu tu tadi, ngenukuka komitmen enggau semaya PH ti nyamin lima teras ungkup Sarawak enggau peranak Sarawak.

    Sempekat baru iya nya hak megai kuasa kandang menua, hak ba petroleum enggau nadai bechiping ba asil, hak ba infrastruktur pemun ti sama enggau pemansang tanah, hak pelajar ti bisi kualiti, hak peranak Sarawak ba pemansang ekonomi ti sebela sereta ngenegapka rebak baru, raban indu enggau raban minoriti.

    Chong madahka manifesto PH nyamin reformasyen struktur enggau pemaik ba langkar atur pengawa dalam konteks MA63 sereta Konstitusyen Perintah Besai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads