Dua buah rumah panjai direrak ketegal meri awak ngagai PBH deka digaga enda lama agi. - Berita Iban Online

Header Ads

  • Baru Nyadi

    Dua buah rumah panjai direrak ketegal meri awak ngagai PBH deka digaga enda lama agi.

    SIBU: Dua buah rumah panjai direrak dikena meri awak ngagai pengawa ngaga projek Jalai Besai Pan Borneo beungkus RM16 bilion ti dipelaba deka dipejalai enda lama agi, taja palan berumah baru ba endur ke bukai.

    Tuai rumah sida madahka pengawa nyungkur palan baru bisi lubah dipejalai.

    Tuai Rumah Kiroh Tegong madah, rumah panjai 16 pintu di Batu 36 Jalai Sibu/Selangau udah direrak dalam bulan Disember taun nyin tadi lalu nyentuk ke diatu palan baru endur ngentak rumah panjai baru apin tembu.

    “Pengawa nyungkur tanah benung dipejalai. Kami diatu diau ba pelabuh rumah panjai lama ti enda direrak lebuh pengawa ngererak rumah taun nyin tadi.

    “Ari rumah ti lantang, diatu kami diatu ngenatka diri sementara ba endur ke mit kelebih kami bisi ngintu pengerami di rumah panjai tauka maya bisi penusah rabat nuntung peranak rumah panjai tu,” ku iya asa.

    Ku Kiroh, palan rumah panjai baru urung enam kilometer penyauh ari rumah panjai ke lama ba tanah iya ke endur iya nanam sawit.

    “Kami udah diau di rumah panjai lama pengelama 23 taun,” ku iya.

    “Aku udah berandau enggau pengari ari kompeni kayu batang bedau lama ke udah minta bantu ari sida nyungkur tanah tang nyentuk ke diatu lalu bedau bisi kereja digaga ba palan baru.

    “Enti ulih, kami dekaka pengari rayat ba kandang menua kami nyaup belanja nyungkur tanah. Nyema sida nadai duit, engka sida ulih berunding enggau kunteriktor ti bisis enggau ngaga projek jalai besai ngambika mantu kami nyungkur tanah ba palan berumah baru,” ku iya.

    Berebak enggau nya, Tuai Rumah Rining Balang enggau nembiak redak iya diau dapur rumah panjai 12 pintu sida ti udah direrak dalam bulan Julai tu tadi.

    Iya pechaya, pengawa nyungkur tanah endur ngentak rumah panjai baru ulih tembu dalam kandang dua minggu nyema dikereja kunteriktor dipadu mekuhka pengawa nya.

    “Kami ngarapka kunteriktor ulih ngenyampatka pengawa nyungkur tanah ba palan rumah panjai baru kami.

    “Kami udah merambu deka berengkah ngentak rumah panjai baru pengudah Gawai Dayak taun baru,” ku iya.

    Seduai udah dikerandau ba pengawa nyuaka chek bayar pampas tanah enggau gazet tanah komunal Bumiputera ari Sapit Kepala Menteri Datuk Amar Awang Tengah Ali Hasan di Palan Sivik Sibu ditu, Hari Tiga tu tadi.

    Rumah panjai Rining enggau Kiroh antara 82 buah rumah panjai di Sungai Igu, Tamin, Batu 36 Jalai Oya, Jalai Sibu/Bintulu, Sekuau enggau Sungai Sebindang, semua dalam pelilih Selangau nerima dokumen rasmi ungkup gazet tanah galau komunal ari baruh Seksyen 6 Kanun Tanah Sarawak.

    Tanah ti mungkur 82 buah rumah panjai bisi 37,454 hektar .

    Berebak enggau nya, bisi 105 iku pengempu tanah nerima chek sepenyampau RM13.6 juta ungkup tanah ti kena renchah projek stesyen mit 33/11KV Sekula Primari (SK) enggau Sekula Sekondari (SMK) Permai, SK Dudong, Ulu Sungai Merah di Sibu enggau pengawa ngaga Stesyen Pengerara Api enggau Penyah Penusah (Bomba) di Selangau.

    Bela bisi datai Menteri Muda Pelajar enggau Pansik Teknologi Dr Annuar Rapaee, Kaban Kunsil Nengeri (ADUN) Tamin Christopher Gira Sambang, Sapit Direktor (Pengatur Pengawa) Opis Tanah enggau Survei (LSD) Nengeri Abdullah Julaihi, Residen Sibu Hii Chang Kee sereta superintendenLSD Sibu Norlina Raee. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads