Jaku dipansut Mahathir semina ‘bungai’ politik aja. - Berita Iban Online

Header Ads

  • Baru Nyadi

    Jaku dipansut Mahathir semina ‘bungai’ politik aja.

    KUCHING: Sapit Kepala Menteri, Tan Sri Datuk Amar James Jemut Masing bepenemu Pakatan Harapan (PH) kelebih agi Tun Mahathir ti madahka deka ngemeratka pekara bekaul enggau Sempekat Malaysia 1963 (MA63), enda ulih dipechaya tang nya semina ‘bungai’ politik aja.

    Iya madahka lima batang pekara baru ti dipenyadika PH nya semina dikena narit ati mensia mayuh kelebih agi pengundi di nengeri tu nyerumba Pengawa Bepilih Besai Ke-14 (PRU 14) ti deka datai tu ila.

    Iya bepenemu Tun Mahathir nadai pengelurus tauka bisi tuju bukai lebuh ke ngenang pasal lima batang pekara ti bepelasarka MA63 nya.

    “Aku amat tekenyit lebuh Tun Mahathir seiku ari orang ti madahka kitai patut beratika pekara nya, ngambika ngulih baru kuasa ti udah lenyau.

    “Maya iya (Tun Mahathir) nyadi menteri besai pengelama 22 taun suba, iya enda kala nyebut pekara nya, semina diatu iya nyebut “aku deka ngaduka kita” laban ti deka narit sukung ngagai PH, iya madahka “kitai deka beratika pekara nya baru”.

    “Aku enda ngasaika iya (Tun Mahathir) ngamatka utai ke disebut iya. Nya semina ‘bungai’ politik dikena narit ati pengundi Sarawak ngambika nyukung PH,” ku iya lebuh dikerandau raban pengarang berita ba sebengkah pengerami ditu, kemari.

    Masing ti mega Kaban Kunsil Nengeri (ADUN) Balleh mansutka pekara nya lebuh ditanya bekaul enggau lima batang pekarang PH ti baru udah dipenyadika Tun Mahathir ditu apin lama, tang enda kala disebut Tun Mahathir maya nyadi menteri besai suba.

    “Lalu aku pan tekenyit laban parti ari Sarawak ngambi bagi ba pekara tu nyengkaum DAP Sarawak,” ku iya.

    Lebuh ke dipinta meri penerang bekaul enggau PH ti madahka diri deka mansik baru 18 pekara dalam sempekat nya, Masing madahka nya kebuah pengawa minta pulai baru kuasa tauka hak bisi dipejalaika perintah nengeri diatu.

    Ku iya ti mega Menteri Pemansang Infrastruktur enggau Perengka Pengangkut madahka 18 pekara nya dikerandau entara perintah nengeri enggau besai.

    Nitih ku Masing ,aum agi dipejalaika sereta arap bendar bisi timbal positif ari perintah besai lalu nya begunaka timpuh.

    “Dulu suba nadai baum, maya Mahathir nyadi menteri besai, iya ngenggaika kitai nyebut pasal nya.
    “Diatu iya (Tun Mahathir) madah, “au, kitai nyebut pekara nya, enti kitai (PH) menang kitai deka ngambi kuasa nya baru” ku iya (Tun Mahathir).

    “Maya iya (Tun Mahathir) bisi kuasa iya enda bemunyi, diatu iya inggar. Nama kebuah? Laban dekaka undi, nya ‘bungai’ politik. Aku ngasaika kitai enda patut pechaya,” ku iya.

    Malam Hari Minggu apin lama, PH bisi bejadika lima batang pekara baru disediaka ungkup nengeri Sarawak nyerumba Pengawa Bepilih Besai Ke-14 (PRU14).

    PH nyamin lima batang pekara nya nengah ‘reformasi struktural dan tatakelola’ ti bepelasarka MA63 enggau Konstitusyen Perintah Besai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads