Jalai alun mai pemansang ngagai kandang menua Kapit. - Berita Iban Online

Header Ads

  • Baru Nyadi

    Jalai alun mai pemansang ngagai kandang menua Kapit.

    NGABAS: (ari kiba) Jamit, Nanta enggau Tuai Rumah Mathaw Bina disempulang peranak rumah panjai ke bukai bejalai ngabas rumah panjai nya.

    KAPIT: Pemisi jalai ukai semina nyadi penyambung genturung pendiau, tang mega nyata deka ngemansangka tanah, ngemudahka perengka pengangkut ngelawa tetiap kandang endur, nambahka rega tanah sereta penatai pemisi, ku Kaban Kunsil Nengeri (ADUN) Bukit Goram Jefferson Jamit Unyat.

    Iya madah ngagai peranak rumah panjai di semanjai jalai Kapit-Song, iya nya sida bulih pemaik ari projek jalai nya laban diatu rumah panjai sida semak jalai ti nyambung tetiap genturung pendiau.


    Iya nyemetak madah pengudah 54 taun, Menteri Besai Malaysia keenam Datuk Seri Najib Tun Razak mendingka peminta kitai lebuh iya ngemendarka belanja dikena ngaga Jalai Kapit-Song-Kanowit.

    “Nya alai, kitai meseti ngenang pengawa perintah ti ngaga jalai ungkup kitai.

    “54 taun udah kitai megai perintah kediri empu, tang semina Najib aja ti mendingka peminta kitai nengah pengawa ngemendarka belanja dikena ngaga Jalai Kapit-Song-Kanowit.

    “Kitai meri terima kasih ngagai perintah ti udah ngagihka belanja dikena ngaga jalai ngelawa semua rumah panjai ti bisi besemak jalai besai. Jalai tu meri mayuh penguntung – perengka pengangkut ti menyana, ngemansangka tanah ngambika bisi nilai tambah sereta ulih mansutka penatai pemisi,” ku Jamit.

    Ku iya, berindik ari sukung kitai ngagai perintah lebuh ti ngundi chalun Barisan Nasional maya pengawa bepilih besai lalu perintah nimbal nya nengah agih belanja ungkup pemansang. Pekara tu bela meri pemaik ngagai kededua piak, rayat nyukung perintah lalu perintah ngagihka belanja dikena mai pemansang, ti pulaika penguntung kitai.

    “Kapit tu kandang menua ba siti pulau. Enda lama agi, kitai deka disambung nengah jalai ngagai Song, Kanowit enggau Sibu.

    “Ngelama tu, pejalai nengah sungai napatka Rumah Mathew Bina di Sungai Yong dalam beberapa jam pengelama ngena perau panjai. Tang diatu, semina setengah jam aja pejalai ngena motor ari Kapit.

    “Aku mega beratika mayuh pengempu tanah ngena peluang pemisi jalai tu berimba tanah sida ungkup pengawa betanam betupi. Bisi sekeda sida nanam getah, buah enggau sayur dikena ngulihka belanja, ke alai dulu suba enda ulih dikereja ketegal nadai perengka pengangkut,” ku Jamit lebuh ngulu Pengawa Bejadika Program Meri Penyedar Rampa Menua Begulai Enggau Komuniti Pelilih Kapit di Rumah Mathew Bina, Nanga Semak, Sungai Yong ditu, lemai Hari Enam tu tadi.

    Program tu mega udah digulu beratus iku peranak rumah panjai di sepemanjai Sungai Yong enggau kandang menua besemak.

    Ngelansa pengawa bepilih ti deka datai, iya ngapil ngagai semua peranak meri sukung sida ngagai penyandang penuduk Parlimen Kapit, Sapit Menteri Pemansang Menua Pesisir enggau Kandang Menua, Datuk Alexander Nanta Linggi.

    “Aku deka meri terima kasih ngagai semua kitai ti udah ngundi aku rambau pengawa bepilih nengeri dalam taun nyin tadi. Nya alai aku ngapil maya pengawa bepilih besai tu ngambika meri sukung ngagai penyandal kitai, Datuk Alexander Nanta Linggi.

    “Kenyau ari lima tauka enam taun ke udah, Nanta udah bejalaika mayuh bengkah projek ditu meri penguntung ngagai kitai. Sekeda ari projek nya baka jematan, jalai, rumah, projek kuasa karan menua pesisir, bekal ai graviti enggau ke bukai,” ku Jamit nerang silik.

    Jamit muji Opis Kunsil Pengeraja Asal enggau Rampa Menua (NREB) ti bejalaika tanggungpengawa beguna endar ngajar mensia mayuh ba pekara idup bebaik enggau rampa menua asal.

    Jamit mega muji NREB ba pengawa ‘outreach’ sida ngagai peranak rumah panjai meri penyedar pemesai guna program rampa menua enggau aktiviti ngintu enggau nyaga rampa menua.

    Ku iya, program ‘outreach’ tu, nengah kaul rama madahka kitai meseti nemu pemesai guna rampa menua ti beresi. Rampa menua ukai semina mungkur pemeresi kandang rumah panjai kitai aja, tang besai agi baka ngintu pemeresi ai sungai, nyaga jelu siga ari ke punas.

    Nangkan nya ku iya, pengawa nyaga pemeresi rampa menua endang nyadi tanggungpengawa kitai. Tetiap iku kitai bisi tanggungpengawa kediri empu.

    “Sapa agi ulih dikearap enti ukai kitai.

    “Perintah bisi semua atur ba pekara enggau program ngintu rampa menua. Nya alai, kitai meseti beratika pangku pengawa dikena nyaga bansa (jelu siga) ti deka punas, ulah nunu kampung, ngintu sungai enggau ke bukai.

    “Sebun ari pengawa nunu kampung ngemai pangka ngagai pengerai. Baka nya mega pemeresi ai sungai enggau bekal ai beresi ti pulaika pemaik ngagai semua kitai.”

    Berebak enggau program sehari nya, iya bisi ngemendarka agih belanja penyampau RM5,000 ungkup Biro Indu Rumah Mathaw Bina sereta RM500 sepintu dikena meli tikai plastik baka ti dipinta 34 pintu bilik rumah panjai.

    Sama bisi datai Datuk Alexander Nanta Linggi, Sekretari Politik Kepala Menteri Sarawak Tapah Ata, Sapit Kontroller NREB Justine Jok Jau Emang, Pemesai RISDA Sibu Khairul Hisham Ismail, Temenggong Wilfred Billy Panyau, Penghulu Nylong Daga, Penghulu Pasang Tubah sereta bala bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads