Kapit deka dikemansang nengah URDA, ku Masing. - Berita Iban Online

Header Ads

  • Baru Nyadi

    Kapit deka dikemansang nengah URDA, ku Masing.

    KAPIT: Presiden Parti Rakyat Sarawak (PRS) Tan Sri Datuk Amar Dr James Jemut Masing ke mega Sapit Kepala Menteri Sarawak enggau Menteri Pemansang Infrastruktur enggau Perengka Pengangkut madahka penyarut enggau pangan diri suba ngujungka sida dikelaung ari jalai lalu Kapit nyadi pulau siti, semina ulih dilawa nengah jalai sungai.

    “Tang diatu kitai beserakup enggau empat komponen parti Barisan Nasional gawa begulai sereta Kepala Menteri Sarawak Datuk Amar Abang Johari udah meri kitai kuasa ngemansangka Kapit nengah pengawa numbuhka Upper Rajang Development Authority (URDA).

    Masing mansutka pekara tu lebuh bejadika pengawa ngelanchar Raban Gawaka Pengawa Bepilih Besai Sitak Parlimen Ulu Rajang ti diatur di Dewan Sri Baleh ditu, digulu beratus iku bala kaban enggau penyukung PRS. Sama bisi datai bala pengari ari tiga parti komponen BN ke bukai.

    Kaban Parlimen (MP) Ulu Rajang Datuk Wilson Ugak Kumbong disabung ngetanka penuduk iya. Iya nyadi MP kenyau ari Pengawa Bepilih Besai (PRU) ke-13, 2013.

    Ugak dipelaba deka menang enggau majoriti besai bepelasarka pemutus Pengawa Bepilih Nengeri (PRN) tu tadi. Ulu Rajang nyadi kubu kuat PRS, ke alai Kaban Kunsil Nengeri (ADUN) di Baleh (Masing), Belaga (Datuk Liwan lagang) enggau Murum (Kennedy Chukpai), lalu kesemua sida nyukung Ugak.

    MP Ulu Rajang Datuk Wilson Ugak Kumbong, ADUN Pelagus Wilson Nyabong Ijang, ADUN Murum Kennedy Chukpai, ADUN Samalaju Majang Renggi, ex-MP Ulu Rajang Datuk Billy Abit Joo, Sekretari Politik Kepala Menteri Sarawak Nicholas Kudi Jantai, Michael Mujah enggau Beatrice Kedoh, Ketuai Kunsil Opis Pelilih Menua Kapit Philimon Nuing, Residen Kapit Joseph Belayong enggau Pemesai Pelilih Bukit Mabong Douglas Pungga, Pemancha David Dian, Pemancha Ajang Sirek, Pemancha Umek Jeno, Pemancha Yong Thu Fook, Penghulu Sia Shui Poh, Penghulu Abang Hamzah Bolhassan, Penghulu Jackson Kubang, Penghulu Nicholas Mering, Penghulu SallanG batang, Penghulu Steward Sawing, Penghulu Undie Baja sekeda ari bala ke bisi datai.

    Perintah udah meri kitai kuasa nengah URDA dikena ngemansangka Kapit. Nya alai, tanggungpengawa diatu dilempai ba kitai. Nyema kitai enda tegagaka iya enggau manah, nadai orang bukai deka disalah kelimpah ari kitai.

    “Kita enda ulih madahka perintah ngelaungka kitai agi. Perintah udah meri kitai hak enggau kuasa ngemansangka iya. Nya alai, nadai agi pengawa besalahka orang bukai. Diatu, bepanggai ba kitai, sekalika kitai deka ngemansangka kandang menua tu. Baka tu chara kitai gawa,” ku Masing.

    Ngelansa pasal pengawa ngelanchar Raban Gawaka Pengawa Bepilih Besai Sitak Parlimen Ulu Rajang, ku Masing, iya chukup gaga enggau pengawa nya.

    “Raban Gawaka Pengawa Bepilih Besai Sitak Parlimen Ulu Rajang enggau penatai kesemua empat parti komponen BN – PRS, PBB, SUPP enggau PDP (Parti Demokratik Progresif ke dulu suba Parti Demokratik Progresif Sarawak - SPDP).

    “Tu ngayanka bisi penyerakup ba semua kitai. Nya alai, nadai kebuah BN ulih alah di Ulu Rajang laban kesemua empat kitai ke bisi ditu bela beserakup,” ku iya.

    Ku Masing, penyakal ulih mansutka sebarang penemu sepeneka sida tang kitai ulih ngalahka sida laban kitai gawaka pengelantang rayat.

    Ngelansa pasal pemansang infrastruktur, ku iya, jalai udah digaga, Jalai Kapit-Song-Kanowit enggau Mujong-Putai. Tiga taun da agi, kitai deka nyadi sebagi ari Jalai Besai Pan Bornei laban deka disambung. Kitai ulih deriba ari Kuching terus ngagai Tekat Ai Baleh.

    Ku iya nerang, 54 taun kitai udah tinggal di belakang laban nadai beserakup dalam parti komponen BN. Menteri Besai keenam, Najib, udah mendingka peminta kitai, ngemendarka projek jalai.

    Kepala Menteri Abang Zohari meri kitai kuasa ngemansangka Kapit nengah URDA. Diatu kitai megai tanggungpengawa ba pengawa pemansang kitai empu.

    Iya madahka diri Chairman URDA lalu sapit iya, Datuk Alexander Nanta Linggi, iya nya Sapit Menteri Pemansang Menua Pesisir enggau Kandang Menua.

    Sekeda bala kaban nyengkaum semua pengari rayat – MP Ulu Rajang Datuk Wilson Ugak Kumbong, ADUN Pelagus Wilson Nyabong Ijang, ADUN Bukit Goram Jefferson Jamit, enggau Residen Kapit Joseph Belayong.

    “Nya alai, kitai meri terima kasih ngagai Kepala Menteri ti udah meri kitai kuasa ngemansangka Kapit. Kitai mega meri terima kasih ngagai Menteri Besai Najib ti udah ngagihka belanja ungkup projek jalai.”

    Nangkan nya, Ulu Rajang ngasilka kuasa gadung 4500 MW. Tekat Ai Bakun 2400 MW, Tekat Ai Murum 900 MW lalu Tekat Ai Baleh ti deka digaga 1300 MW. Kitai nyediaka kuasa meri penampak ngagai Sarawak lalu kitai meri bekal kuasa ngagai industri. Seraya meri penampak ngagai Sarawak, rayat meri kitai kuasa ngemansangka Kapit.

    Ku iya, kitai nadai pilih ke bukai tang beserakup sereta gawa begulai nadai ngira ari ni penatai kitai. Kitai semina bisi siti pilih aja lalu batang tuju kitai deka ngemansangka Ulu Rajang. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads