Komuniti Dayak dipinta ngatur mayuh aktiviti dikena negutka penyerakup. - Berita Iban Online

Header Ads

  • Baru Nyadi

    Komuniti Dayak dipinta ngatur mayuh aktiviti dikena negutka penyerakup.

    CHAMPION: Mawan (lima kanan, rintai belakang) nyuaka trofi Champion ngagai menijar tim Pebadas Simon Aleh Bol. Sama bisi nyempulang iya ba atas panggau Mussen, Salang enggau Gira sereta mega bala pemain Pebadas 2 Team sereta sekeda ari kaban komiti pengatur pengerami makai lemai.

    KUCHING: Bala kaban komuniti Dayak ti udah diberi pangku pengawa patut chakah agi ngatur aktiviti ngaul main asal, pengawa pengasih, pelajar enggau lumba dikena negutka penyerakup.

    Bansa Dayak semina ulih beserakup enggau bekerejasama ba atur aktiviti rama ke bansa tu lalu tu udah diuji sereta nyata maya semua sida ti bebida penemu politik enggau asal penatai bela sampal datai gawa sereta meri sukung.

    Presiden Gerempung Bansa Dayak Sarawak (SDNU) Tan Sri William Mawan Ikom mansutka penemu nya lebuh bejadika pengawa nutup enggau nyuaka perais ungkup Pekit Badminton Mangkuk Presiden SDNU 2017 di sebengkah hotel ditu, malam Hari Enam tu tadi.

    Mawan, ti semina siku aja pengari rayat terus Barisan Nasional (BN) di Malaysia madah penyerakup dalam politik ulih nyeliah bansa Dayak bepechah.

    “Politik tu ngasuh pechah,” ku iya.

    Ba pekara negutka penyerakup bansa Dayak tu, ku iya, lebuh mayuh raban enggau bansa ngaul diri dalam pekit badminton sereta ngulu pengerami makai lemai Hari Enam.

    Pekara pemadu beguna ku iya, pengari rayat enggau bala ketuai datai ngulu pengerami makai lemai lalu nyukung pekit ari pengawa ngemendarka geran ungkup Pekit Badminton Mangkuk Presiden SDNU 2018.

    Mawan ke mega Kaban Parlimen (MP) Saratok enggau Kaban Kunsil Nengeri (ADUN) Pakan madahka kelai ulah bebaik enggau pengasih ukai semina ulih dipeda rambau pekit badminton ke diatur sebarang NGO Dayak tang mega ba main golf enggau futsal sereta mega program ti bekaul enggau pengawa ngintu pengelantang sereta pemansang pelajar ti ngaul bansa Dayak.

    Kena malam Hari Enam, komiti pengatur Badminton SDNU teulihka belanja penyampau RM50,000 lebuh Mawan ngemendarka geran perintah penyampau RM25,000 dientudika Menteri Muda Industri enggau Beranakka Puku Malcolm Mussen Lamoh ngemendarka RM10,000, MP Julau Datuk Joseph Salang Gandum (RM10,000) enggau ADUN Tamin Christopher Gira Sambang (RM5,000).

    Penyampau kesemua RM50,000 tu ngelui ari RM20,000 geran perintah ti disemaya Gira rambau iya bejadi pengawa muka pekit kena Hari Lima di Palan Lumba Sentosa di Jalai Stakan ditu.

    Hari Enam tu tadi, Persatuan Badminton Dayak Sarawak (Pebadas) Team 2 bulih gelar champion pengudah ngalahka Pebadas Team 3 seraya SDNU Samarahan A enggau Madu Boyz A bekunsika penuduk ketiga. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads