Mahathir: PH ngarapka agih asil petroleum ulih diperunding baru. - Berita Iban Online

Header Ads

  • Baru Nyadi

    Mahathir: PH ngarapka agih asil petroleum ulih diperunding baru.

    MERI SUKUNG: Tun Mahathir bejaku ba mua beribu penyukung enggau rayat ke datai mendingka licha Pakatan Harapan Sarawak di Kuching malam ensanus.

    KUCHING: Pakatan Harapan (PH) ngarapka ulih berundingka baru agih asil petroleum menua enggau Sabah sereta sarawak ngambika enda bechiping.

    Chairman PH Tun Dr Mahathir Mohamad madah agih asil petroleum ngagai kededua nengeri nyata dipeda bechiping tang enggai nyadi enda diturut.

    “Maya Akta Pembangunan Petroleum dikemendar ba taun 1974, nadai randau entara Sarawak, Sabah enggau Semenanjung Malaysia.

    “Pekara ke bisi maya nya semina aum parlimen lalu ngemendar sempekat, ti enda merundingka peminta rayat Sabah enggau Sarawak.

    “Tu ketegal ba dalam parlimen, pengari ari Semenanjung mayuh agi ari Sabah enggau Sarawak lalu tetiap undang-undang ke dituku Perintah Besai deka dikemendar,’ku iya.

    Iya mansutka jaku nya ba mua beribu penyukung enggau rayat ke datai mendingka Licha Pakatan Harapan Sarawak ke diatur di laman Everrise, BDC ditu, malam ensanus.

    Tun Mahathir nambah, maya Akta Pembangunan Petroleum dikemendar ba taun 1974, iya ukai Menteri Besai lalu nyangkal tuduh iya ngubah undang-undang nya.

    “Bepun ari nya, kitai bisi undang-undang ke baka nya sereta mega enggau kandang tasik (Akta Wilayah Laut) ke alai kitai nemu sebagi ari kandang tasik diempu nengeri ke ba mua tasik nya.

    “Tang maya kitai ngaga undang-undang nya, kandang tasik tu diempu Malaysia ke nyadi sebengkah menua lalu enda ngira Sabah, Sarawak enggau Terengganu.

    “Sekali agi sempekat nya enda ngira tiga nengeri ti begempung numbuhka Malaysia lalu ketegal nya Sabah enggau Sarawak diberi 5 peratus ari asil petroleum,’ku iya.

    Tun Mahathir madah iya udah nyadi Menteri Besai pengelama 22 taun lalu dalam timpuh nya enda kala ngubah sempekat Sabah enggau Sarawak, ke amat undang-undang nya meseti diperunding baru ngambika adil.

    “Tu mih juluk kitai dalam Pakatan Harapan. Enti tiga nengeri tu begempung, kitai deka kaya agi,” ku iya.

    Berindik enggau nya Tun Mahathir ngelalau rayat Sarawak kelebih agi orang ngundi ngambika meri sukung ngagai PH ba Pengawa Bepilih Besai ke-14 (PRU14) ti deka datai.

    Enti PH menang dua pertiga majoriti ba PRU14 ku iya, pakatan besemaya deka merundingka baru 20 pekara ungkup Sabah enggau 16 pekara ungkup Sarawak baka ke disetuju ba Sempekat Malaysia 1963. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads