Masing: Lima batang pekara baru ke ditempa PH enda ulih dikearap. - Berita Iban Online

Header Ads

  • Baru Nyadi

    Masing: Lima batang pekara baru ke ditempa PH enda ulih dikearap.

    KUCHING: Sapit Kepala Menteri Tan Sri Datuk Amar Dr James Jemut Masing madah lima batang pekara baru ungkup Sarawak ke disedia Pakatan Harapan (PH) enda ulih dikearap enti Tun Dr Mahathir Mohamad, Lim Kit Siang enggau Datuk Seri Anwar Ibrahim ba dalam gempung parti penyakal.

    “Enti Mahathir, Anwar enggau Lim Kit Siang bela dalam gempung PH, aku enda pechayaka jamin ke diberi sida.

    “Kelimpah ari Mahathir, Anwar enggau Lim Kit Siang, dini sida (PH) sebedau tu? Nama utai ke udah digaga sida ungkup Sarawak?..Nadai,’ku Masing.

    PH sereta ketuai parti penyakal ku Masing nambah enda kala ngubah ulah sida ungkup Sarawak enggau Sabah.

    Iya ke mega Presiden Parti Rakyat Sarawak (PRS) enggau nyemetak madah enda arapka PH ulih nyamin lima batang pekara ungkup Sarawak sereta rayat Sarawak.

    Iya mansutka jaku nya nimbal lima batang pekara baru ungkup Sarawak sereta rayat Sarawak ke dibacha Chairman PH ke mega Chairman Parti Tindakan Demokratik (DAP) Sarawak Chong Chieng Jen rambau ‘Cemarah Pakatan Rakyat’ di BDC ditu, malam ensanus.

    Dulu agi ari nya, Tun Mahathir ke nyadi Chairman PH(Menua) nyuaka lima teras baru nya ngagai Chong lalu dibacha ngagai beribu penyukung ke bisi datai.

    “Kami PAKATAN HARAPAN keran sereta besemaya nyamin lima teras ungkup wilayah Sarawak enggau rayat Sarawak, keterubah Hak perintah Wilayah, Hak Petroleum enggau asil ke adil, Hak Pemansang Infrastruktur ke diguna enggau Tanah Sama bela, Hak Pelajar ke bekualiti enggau Hak Pemansang Ekonomi Sama bela enggau Ngeringka bala nembiak, Orang Indu enggau raban minoriti.

    “Lima batang pekara baru dijamin nengah reformasyen struktural enggau dikemujur manah bepelasarka Sempekat Malaysia 1963 sereta Konstitusyen Perintah Besai,’ku Chong macha.

    Masing ke mega Menteri Pemansang Infrastruktur enggau Pengangkut madah setujuka lima teras baru PH nya ti meratka pinta enggau peneka Sarawak tang iya pechaya PH enda ulih ngemujur semua nya.

    “PH meretika pinta enggau peneka Sarawak, aku setuju. Tajapia aku enda arap PH ulih ngemujur nya,”ku iya.

    Ngenang kaul ke sama, Sapit Kepala Menteri Datuk Amar Douglas Uggah ba sebengkah pengerami kemari madah lima batang pekara nya semina dikena PH nginti undi rayat. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads