Mayuh program dilangkar nyerumba ‘Showcase Keusahawanan, Karnival Kepenggunaan’. - Berita Iban Online

Header Ads

  • Baru Nyadi

    Mayuh program dilangkar nyerumba ‘Showcase Keusahawanan, Karnival Kepenggunaan’.


    RICHAH: Sekeda ari rampa tinjau program ‘Showcase Keusahawanan, Karnival Kepenggunaan’ enggau ACSJ IV Betong 2017 di Tapak Pesta, Medan, Bandar Baharu semak ditu.

    BETONG: Bemacham pengerami dilangkar nyerumba pengawa ngatur ‘Showcase Keusahawanan, Karnival Kepenggunaan’ enggau ‘Anugerah Carta Sapa Juara’ (ACSJ) IV Betong 2017 ti diatur di Tapak Pesta, Medan, Bandar Baru semak ditu.

    Program ti diatur nyadi pengerami ninting taun diatur berengkah ari 22 September nyentuk 1 Oktober 2017 sekali tu nyediaka 140 buah bangsal ti ngaul 32 bangsal pilih, 52 bangsal pemakai halal, 12 bangsal Dapur Betong, 16 bangsal ungkup pemakai enda halal lalu lapan bangsal ungkup automobil enggau pengawa bejual asil betanam betupi.

    Atur pengerami ngaul kerejasama Opis Residen Betong, Komiti Pemansang Orang Dagang Bumiputera (MPUB), Kaunsil Pelilih Betong (MDB), KPDNKK, Opis Menteri Betanam Betupi Moden, Tanah Adat enggau Pemansang Kandang Menua Sarawak lalu dikemujur Top Event Services Sdn Bhd.

    Pengawa bejadika program udah dipenyadi Kaban Kunsil Nengeri (ADUN) Layar, Gerald Rentap Jabu kena 22 September tu tadi.

    Seraya program Anugerah Carta Sapa Juara (ACSJ) ti masuk musim ke-4 udah dipenyadi Sapit Kepala Menteri, Datuk Amar Douglas Uggah Embas kena 23 September.

    Kelimpah aktiviti bejual ngaul pedagang di menua tu enggau ari luar Betong, bela dipejalai bemacham aktiviti dikena ngisi pesti ti ditapatka bala pengusung ti deka mega atur pengerami ke bisi disedia.

    Panggau pemerindang matak pengusung muakka malam ti meda penatai bala artis Iban enggau artis luar tebilang ti bisi dikangau datai merindang.

    Kelimpah ari pekit Karaoke, pekit Ratu Seri Kebaya, pekit nusi ensera, pekit Tanda Kreatif Poco-Poco, pekit Betanda, Nyumai Menu Bepengerai, Nusuk Manik, Ngelinsu Batik enggau Pekit Ngelinsu Nembiak Mit mega bisi diatur.

    Kus nupi Kelulut, Licha ‘Entrepreneurship Educators’ enggau Licha Pekara Dagang kelimpah pengawa mandang enggau bejual.

    Aktiviti Lumba Rama Ai mega disedia kena ngisi program ti ngaul Betong Warrior, Lumba Pelampung, Nangkap Itit, Nginti Ikan Keli, Gusti Panggal, Titian Ensikal enggau Perau Dilagu.
    Pengawa bejadi nangguh pengerami deka dipenyadi Datuk Amar Douglas Uggah Embas kena 30 September tu ila. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads