Mensia mayuh dilalau nentuka jelu tupi enda bekedayau. - Berita Iban Online

Header Ads

  • Baru Nyadi

    Mensia mayuh dilalau nentuka jelu tupi enda bekedayau.

    BAUM: Tiong (tengah) lebuh ti ngetuaika aum ensana, seraya Rogayah (kiba) enggau Thian (kanan) bela bisi datai.

    SIBU: Seriris enggau pengawa perintah nagang igi penyakit Rabies ngelekai di nengeri tu, Opis Kaunsil Mengeri Sibu (SMC) nangkan mensia mayuh ngambika megai tanggungpengawa sereta enda nejuka ukui sida bekedayau di luar kandang genturung pendiau lalu nadai dikemata.

    Chairman SMC Datuk Tiong Thai King madah, bisi 109 iku ukui udah ditangkap SMC ari 1 ngagai 21 September tu tadi, ke alai 20 iku ari penyampau nya udah diambi pulai dalam timpuh ke sama.

    “Piak kaunsil ke diatu benung chakah bejalaika operasyen nangkap dini pan ukui bekedayau di sitak dipegai kitai (SMC). Tu dikena nagang igi penyakit Rabies tu ngelekai ti dibai ukui ke bekedayau,” ku iya rambau ngetuaika AUm Ninting Bulan di bilik aum SMC, Wisma Sanyan, kemari.

    Sama bisi datai Sapit Chairman SMC Rogayah Jamain enggau pemangku Sekretari SMC Jong Thian Puk.

    Tiong ke mega Kaban Kunsil Nengeri (ADUN) Dudong madah, nyema pengempu ukui deka ngelepaska ukui sida ari ditan SMC, sida patut mayar ukum RM25 ungkup keterubah.

    Seraya ukum deka ditiki manggai RM50 kedua kali lalu deka ditambah RM5 nyema ukui diinang sida nadai lisin ti sah, ku iya nambah.

    Pia mega ku iya, ke diatu, piak SMC benung ngiga chara bukai tauka atur terit agi dikena nentuka pengempu jelu inang kelebih agi ukui bisi tanggungpengawa nyaga ukui sida empu.

    “Berindik ari nya, kitai minta mensia mayuh kelebih agi pengempu jelu inang ngambika bisi tanggungpengawa nyaga jelu inang sida nentuka penusah ke enda disadang ulih diseliah,” ku iya.

    Ba lansa ke bukai, Tiong ngansak sida ti mayar chukai ngambika mayar chukai taksiran ungkup separuh kedua taun 2017 kena tauka sebedau 31 Oktober 2017.

    Ku iya, baka ti udah dipinta Opis Menteri Pengawa Berumah enggau Kaunsil Kandang Menua, nadai pekara ngurang tauka nginsil yuran ngagai sida ti mayar pupu tauka sebarang peminta enda deka dikeibuh.

    Berindik ari nya, iya minta mensia mayuh, kelebih agi sida ti mayar chukai ngambika meri kerejasama ti manah ngagai SMC bekaul enggau pekara nya.

    “Mensia mayuh tau mayar chukai nya di kaunter SMC ba Palan Transformasyen Mengeri (UTC) Sibu tauka nengah servis online di ‘Paybills Malaysia’,” ku iya nambah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads