Ngangkatka status sosio ekonomi rayat nyadi batang agenda pemansang ADUN Meluan. - Berita Iban Online

Header Ads

  • Baru Nyadi

    Ngangkatka status sosio ekonomi rayat nyadi batang agenda pemansang ADUN Meluan.

    NGEPUNKA PENGAWA: Rolland (empat kanan), Seman (lima kanan) sereta bala bukai miring ba tanah pendam Lasi ke baru.

    JULAU: Mantu peranak ngangkatka pemanah status sosio ekonomi nyadi agenda ti dikemeratka iya nyadi pengari rayat, pia ku Kaban Kunsil Nengeri (ADUN) Meluan, Rolland Duat.

    Ba pekara tu, iya beratika pematut ngembuan semua infrastruktur, penyikap perengka guna enggau perengka rama di menua nya, ku iya rambau gempuru Ketuai Enggau Komuniti di Rumah Seman Panting di Lasi, semak ditu, Hari kena Lima minggu nyin tadi.

    Iya deka gawaka sida ngambika bela bekunsika sebarang agih pemansang ke bisi ari perintah, ku iya.

    “Aku deka minta agih ari belanja RM1 bilion ti diagih Kepala Menteri Datuk Patinggi Abang Johari Tun Openg dikena ngemanah enggau ngangkatmanah sekula ba kandang menua pesisir, agih belanja dikena nyambung bekal ai enggau elekterik, ngaga jalai, nyambung sistem arus penyambung ti meruan enggau ke bukai ari opis bekuasa bekaul,” ku iya.

    Bekunsika siti berita manah ba projek pemansang ungkup Meluan, ku Rolland, agih belanja RM45,000 udah dikemendar Opis Pemansang Menua Pesisir enggau Kandang Menua dikena ngaga tangki ai tinggi ti bekal ai beresi ngagai kandang menua Entabai sereta kandang menua besemak ke bukai.

    Iya puas ati enti semua ruang bilik dalam sitak dipegai iya ulih ngasaika pengelantang ba sambung jalai alun ti meruan, sekula ti manah, servis pengerai, bekal ai enggau elekterik, sistem arus penyambung ti dipechaya ulih ngangkatka status ekonomi, ku Rolland nandu.

    Iya deka numbuhka kaul kereja enggau bala menteri Barisan Nasional (BN) di renggat nengeri enggau perintah besai dikena nentuka Meluan enda tinggal ba sebarang program pemansang, ku iya nyemetak.

    Iya mega deka berunding ngena agih belanja ninting taun ari baru Program Transformasyen Menua Pesisir (RTP) ti begunaka projek lengkas enti iya enda teulihka sebarang belanja ari pemansut ke bukai, ku Rolland.

    Ambika chunto ku Rolland, iya udah nganjung ngagai opi s bekuasa bekaul peminta ngaga jematan ari peranak di kandang menua Lasi lalu nyema nya enda dikemendar, engka iya deka ngagihka sebagi ari RTP dikena ngaga projek, enda ngira sekalika ungkus nyangka manggai RM1 juta tauka RM2 juta.
    “Aku seruran arapka diri nengah sukung ke tegap ngambika peminta sida dikunsika projek ari perintah, nya alai aku ngapil ngagai semua rayat di Meluan ditu beserakup ngambi pulaika pemaik sida empu,” ku Rolland nandu.

    Berebak enggau nya, Rolland bisi nyuaka chek RM40,000 dikena meli sebidang tanah ungkup pendam Lasi ke baru sereta dikena ngaga jalai nuju endur nya seraya nyamin peranak di kandang menua nya deka nerima agih ari MRP enggau RTP iya taun baru. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads