Projek jematan Sg Anap mai pengelantang ngagai 49 buah rumah panjai. - Berita Iban Online

Header Ads

  • Baru Nyadi

    Projek jematan Sg Anap mai pengelantang ngagai 49 buah rumah panjai.

    SELAMAT DATAI: Penatai Entulu enggau bini iya Datin Jacklyn Anthony disambut mensia mayuh enggau basa.

    TATAU: Penembu projek jematan Sungai Anap ti bekenaka ungkus RM3.2 juta deka mai pengelantang ngagai peranak 49 buah rumah panjai ba menua nya.

    Projek jematan 100 meter nya enggau pemesai 3.7 meter digaga berengkah 2 Ogos tu tadi lalu disadang tembu pun bulan Jun 2018.

    Kelimpah ditengah peranak rumah panjai, jematan tu bela ngelawa dua buah sekula, dua buah kelinik pengerai enggau sebuah Opis Betanam.

    Menteri ba Opis Menteri Besai Datuk Joseph Entulu Belaun madah, nitihka ripot ke diterima, nyema projek jematan nya enda digaga, dia mensia mayuh ke diau dia mengkang nengah jematan ke digaga kompeni kayu.

    “Diatu, rayat ditu agi ngandalka jematan kompeni ti tau runtuh sebarang maya,” pia ku iya madah.
    Iya bejaku munyi nya maya aum media sepengudah bejadi Pengerami Nasih Tanah Projek Jematan Sungai Anap, enda jauh ari Rumah Penghulu Intu Santap, Ulu Sungai Anap, Tatau, lemai ensana.

    Entulu ti mega Kaban Parlimen Selangau madah, belanja dikena ngaga projek jematan nya ukai agih diberi perintah iya ke bisi diatu tang agih ke dipinta baru.

    “Maya aku minta belanja suba, aku mai Ketuai Direktor Unit Penyelarasan Pelaksanaan (ICU) datai kitu lalu iya besetuju jematan nya digaga kelimpah besemaya ngiga chara dikena ngiga belanja ngaga jematan nya,” ku iya nerang.

    Ngelansa sentang projek nya ti laun digaga, ku Entulu, pekara nya nyadi laban pansik ti silik iya ke bekenaka timpuh ti lama meseti digaga dulu.

    “Tu dikena nentuka tanah dia engkeman tauka enda dikena ngaga projek tu ngambika penanggul dudi hari enda nyadi.

    “Tang taja pan baka nya, bisi orang ngena awak tu melitik penemu rayat bukai madahka projek tu semina semaya balang aja.

    “Sida enda nemu aku udah bulih agih belanja dikena ngaga projek jematan tu, enda sampai setaun udah aku nganjung peminta,” ku iya nerang.

    Iya madah, puku belanja ngaga projek nya udah ba Indu Opis Kereja Raya (JKR) bulan Januari 2015 lalu diatu udah taun 2017.

    Entulu madah, ari penyampau semua puku belanja, projek jematan nya baka ke projek mit.

    “Taja pia, ba kitai rayat di menua pesisir, jematan tu beguna amat ngagai kitai,” ku iya madah.

    Sama bela datai maya pengerami tu iya nya Sekretari Politik Menteri Besai Adriana Chumang Nyambung, Sekretari Besai Menteri Ba Opis Menteri Besai Bayang Ringkat, Penghulu Intu Santap, Kaunsilor Dali Merawing sereta bala bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads