SPRM meransang mensia mayuh nyadi kaban GERAH. - Berita Iban Online

Header Ads

  • Baru Nyadi

    SPRM meransang mensia mayuh nyadi kaban GERAH.

    MIRI: Komiti Nagang Pengawa Makai Suap Malaysia (SPRM) meransang bala komuniti nyadi ‘mata enggau pending’ SPRM enggau nyadi kaban Gerakan Revolusi Anti Rasuah (GERAH).

    Direktor SPRM Sarawak Dato Badrul Shah Norman madah GERAH udah dimun kena 1 Ogos tu tadi, lalu ulih disereta semua serak komuniti beumur 18 taun enggau tuai agi.

    “Kaban GERAH SPRM megai tanggungpengawa nyadi mata enggau pending SPRM ngeripot sebarang ulah makai suap ngagai SPRM sereta nyaup pengawa ngemunaska penyalah makai suap,” ku iya rambau program ‘Kembara Jelajah Anti Rasuah’ 2017 (KEJAR 17) SPRM kemari.

    Badrul madah Kepala Komiti SPRM dipelaba deka mantaika penerang senentang pengelebih enggau pengelui nyadi kaban GERAH SPRM, kena 1 Oktober tu.

    “Kaul bala komuniti ti nyadi kaban GERAH SPRM deka meransang runding ti enggai ngaul ulah makai suap seriris enggau tuju kimpin iya nya ‘Jangan Hulur, Jangan Kawtim dan Jangan Settle’,” ku iya nerang.

    Peminta nyadi kaban GERAH ku iya muntang endar lalu sida tau betanya terus ngagai pemesai SPRM Sarawak berengkah ari kemari.

    Ba lansa bekaul, Badrul madahka KEJAR 17 nyadi program besai ti dipejalai SPRM nyerumba genap taun SPRM Ke-50.

    Dalam program nya, bala ketuai SPRM deka begulai matau menua ngagai tetiap nengeri di Malaysia dikena minta sukung rayat ngambika begempung sereta sepenemu nyeliah ari ngaul diri ari pengawa makai suap.

    “Di Sarawak, pogram KEJAR 17 berengkah di Limbang kena 24 September lalu deka tembu di Palan Pematih Pengajar (IPG) Kampus Tun Abdul Razak Kota Samarahan kena 28 September tu,” ku iya.

    Pia mega ku iya, ulah makai suap enggau salah guna kuasa patut dipunas di semua renggat akar umbi.

    “Aku pechaya program ke bansa tu deka nyadi pelasar ngagai SPRM ba pengawa meri penerang anti-makai suap, penyelewengan sereta salah guna kuasa orang gawa perintah, Gempung Ukai Dikuasa Perintah (NGO) sereta bala ketuai raban bansa,” ku iya.

    SPRM ku iya madah nyemetak, ukai ejensi ti mar dikaul tang ejensi nya ngatur program dikena ngaul diri semak begulai enggau bala komuniti sereta ngerembaika penerang nagang penyalah makai suap. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads