100 juta skolarsip ungkup nembiak ti deka ngaga pansik STEM. - Berita Iban Online

Header Ads

  • Baru Nyadi

    100 juta skolarsip ungkup nembiak ti deka ngaga pansik STEM.

    KUCHING: Perintah nengeri Sarawak ngungkupka RM100 juta skolarsip ngagai nembiak di nengeri tu ke bisi ati deka ngaga pansik bepelasarka Sains, Teknologi, Injiniring enggau Matematik (STEM),nambahka penyampau nembiak ke ngaga pansik bekaul STEM di nengeri tu.

    Menteri Opis Kandang Menua enggau Pengawa Berumah, Senator Datuk Dr. Sim Kui Hian madah taja pan penyampau skolarsip nya mayuh tang naka ke diatu semina 25 ngagai 26 peratus aja nembiak nengeri tu belajar pasal STEM.

    “Pelajar nyendiaka peluang, nya kebuah pelajar nya beguna endar. Kitai patut berati sereta ngena Blue Ocean Strategy (BOS), ngambika kitai ulih nginsit ke atas lalu anang seruran berasai lantang aja. Enti kitai berasai lantang belama, kitai enda ulih ngemansangka diri, lalu enti kitai ngereja pengawa kitai nya, pengawa enda berubah ngujungka kitai enda mujur,” ku Dr. Sim.

    Iya madah munyi nya lebuh bejaku ba atur pengawa Kongres Nembiak Entarabansa 2017 ti berambaika leka jaku ‘Forging the Future of Malaysian Youth’ ke bela digulu urung 800 nembiak universiti ari UCSI , UNIMAS, UiTM, Kolej Cosmopoint, Universiti Swinburne Teknologi Kampus Sarawak, sereta sekeda nembiak ari menua Singapore enggau Korea, di Universiti UCSI ditu, ensanus.

    Nya alai ku iya, nyema bala nembiak deka ngaga ubah ba lanskap ekonomi menua tu, sida enda tau enda begulai enggau orang ke mayuh penemu pasal pekara tu lalu sama nyingkang enggau sida ke tuai agi.

    Ambika chunto, sekeda ex-orang politik, pengudah nadai agi dalam dunya politik baru sida madah deka ngaga ubah. Lapa enda ngaga ubah maya agi megai kuasa, agi dalam politik.

    Ku iya baru, bala nembiak engka nyadi orang ti dikearap jemah ila tang orang ke tuai agi sama bisi pemerat ba pekara nya.

    “Kami ke tuai agi deka bekunsika penemu kami, kami deka madah ngagai kita utai ke salah digaga kami ngambika kita nembiak enda ngaga penyalah ke sama.

    “Belajar ngagai utai ke enda patut digaga ti sama pemerat enggau belajarka pekara ke patut digaga, ngambika kita jampat nangkap sereta jampat datai ba atas,” ku iya.

    Iya mega madahka asal pengelikun siber, laban ari siber tu datai mayuh macham cherita bula, siber ‘bully’, ku iya.

    “Penanggul tu enda kala nyadi maya umur kami kelia. Amat pekara nya matak ati kitai, tang kitai enda tau enda ngembuan runding ke tegap. Kita nemu berapa iku bala nembiak kitai munuh diri ketegal siber ‘bully’, ti ngereja pengawa ke nadai guna sekali, ngerugika kita empu.

    Dr Sim mega madah, sebengkah agi pengawa ke tau dikereja bala nembiak iya nya ngaul diri ba sektor betanam betupi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads