Header Ads

  • Berita Tebaru

    275 iku graduet nerima SKM ba Konvokesyen SLDN 2017

    Dato Sri Michael Manyin
    KUCHING: Konvokesyen Sistem Latih Dual Nasional (SLDN) 2017 Nengeri Sarawak ke diatur di BCCK kemari udah nyuaka Setipikit Pengelandik Malaysia (SKM) ngagai 275 iku graduet peranak Sarawak.

    Pengawa dipenyadi Menteri Pekara Pelajar, Sains enggau Pansik Teknologi Dato Sri Michael Manyin.

    “Raban graduet ke dikerami kitai sehari tu udah milih bengkah pengelandik ke ngena, ke diguna ba industri 4.0.

    “Pengelandik teknikal enggau vokasyenal (TVET) dikemerat di menua besai (baka ke di Jerman) lalu deka dikemerat di Malaysia.

    “Raban orang ke landik ba pekara TVET deka nyaup Sarawak mujur ba ekonomi digital,” ku Manyin.

    Berindik enggau nya, Manyin madah Perintah Sarawak nengah opis menteri iya sigi keran deka nempa modal mensia ke bekualiti.

    Ku iya, pekara nya berat ketegal pinta nempa pengereja pengawa ke ngembuan pengelandik majak nambah seraris enggau pemansang teknologi.

    Ngenang sentang SLDN, Manyin madah latih nya chukup engkeman ba atur nempa raban orang ke ngembuan pengelandik TVET.

    “Nengah chara tu, bala graduet diberi awak ngulihka pengelandik nyemaka pinta pengelandik ke diguna ba industri.

    “Balajar chara ‘hands-on’, graduet SKM deka ngembuan pengelandik ba sebengkah teknologi enti dibandingka enggau graduet ari universiti ti beratka pekara teori,” ku Manyin nandu.

    Ungkup taun 2017, 20 iti palan latih begempung enggau Opis Pemansang Pengelandik (JPK) ngemujur SLDN 2017 di Sarawak.

    Bela datai Sekretari Mendam Opis Menteri Pekara Pelajar, Sains enggau Pansik Teknologi Datu Sudarsono Osman, Ketuai Diretor JPK Tuan Nidzam Kamarudlzaman, Direktor SLDN Tuan Mohamad Yaacob enggau Direktor JPK (Sarawak) Zaid Mat San. #UtusanBorneo

    No comments

    Post Top Ad