Header Ads

  • Berita Tebaru

    Abdullah muji chara betanam moden pekebun di Meradong

    TEKAIT ATI: Abdullah (dua kiba) maya datai meda limau Bintangor enggau nanas enggi Megerat Brain.
    BINTANGOR: Menteri Muda ba Opis Kepala Menteri (Korporat) Abdullah Saidol ngembuan juluk ati deka nunda chara betanam moden baka ke dikemeran orang bekebun ba pelilih Meradong ngambika ulih bela dikena di Pulau Bruit.

    Iya ti mega Kaban Kunsil Nengeri (ADUN) Semop madah, taja gaya tanah ba dua bengkah endur nya enda sebaka tang nyangka chara betanam dia ulih ditunda.

    “Ba pelilih Meradong mayuh projek-projek enggi orang bekebun mit baka nanam nanas enggau limau tauka iya ke bukai.

    “Aku bisi ati deka ngabas kebun tu ngambi beratika chara ke dikena ditu nyangka tau dikena ngaduka pengawa ke sebaka ba DUN Semop baka di Pulau Bruit,” pia ku iya madah maya ngulu Pesta Limau Bintangor 2017 ditu, malam kilah ensana.

    Iya madah, perintah nengeri nengah Opis Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas ngungkupka mayuh belanja dikena ngemujurka pengawa bekaul enggau betanam betupi.

    “Reti iya, agih belanja endang bisi diungkupka ngagai rayat ke bisi ati ngemansangka pengawa betanam betupi baka ba pengawa betanam bebala mayuh,” ku iya madah.

    Berebak enggau penatai iya maya nya, iya mega bisi ngabas kedai nyual limau enggi Megerat Brain ari Sungai Ilas.

    Ba pekara bukai, Abdullah ti mega Sekretari Besai SABERKAS maya tu bela ngansak SABERKAS Pampang Meradong ulih ransing bejalaika pengawa baru.

    Iya madah, maya aum SAERKAS ke diatur di Kuching empai lama, SABERKAS pampang Meradong nadai nganjung pengari.

    “Sebedau SABERKAS tu dikinsil, aku ngarap bisi protem baru digaga ditu.

    “Enti sida ke dulu enda dapat agi bejalaika Saberkas, aku minta kita nyurutka diri lalu meri awak ngagai sida ke nembiak megai Saberkas ditu,” pia ku iya madah.

    Iya madah, mayuh raban nembiak di pelilih Meradong baikka di rumah panjai, genturung pendiau tauka ba pasar Bintangor empu mantaika sebana nadai platform alai sida ngaduka program bekaul lebih agi baka ba Saberkas. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: