Agih RM1 bilion ari Perintah Besai ngelui ari pinta perintah nengeri - Berita Iban Online

Header Ads

  • Baru Nyadi

    Agih RM1 bilion ari Perintah Besai ngelui ari pinta perintah nengeri

    MENUA MAJU BEPUN ARI SEKULA: Manyin (tiga kiba) nyuaka frame gambar sekula SK Landeh ngagai Abang Johari, seraya dikemataka (ari kiba ke kanan) Rakayah, Manyin, Sudarsono, Abang Johari, Chong enggau Sulaiman.
    Pekara tu kala dipejurai enggau Menteri Pelajar lalu dipesetuju Perintah Besai.

    KUCHING: Agih RM1 billion ke diberi Perinta Besai ngagai Sarawak (ungkup ke pelajar) nengah Bajet 2018 ke udah dibantaika Menteri Besai Datuk Seri Mohd Najib Tun Razak kena Hari Lima minggu siti nyin tadi, ngelui ari penyampau bajet ke dipinta Perintah Nengeri, ku Kepala Menteri, Datuk Patinggi Abang Johari Tun Openg.

    “Sigi lebih ari ke dipinta taja pan agi bedau chukup enti deka ngemanahka tauka ngaga rumah sekula baru di Sarawak, kelebih agi di menua pesisir, ti mayuh udah jai tauka enda lantang alai besekula agi.

    “Pekara tu kala dipejuraika enggau Menteri Besai enggau Menteri Pelajar, Dato Sri Mahadzir Khalid, lalu Perintah Besai setuju ngungkupka RM1 billion,” ku iya.

    Dalam kandang dua taun berengkah ari diatu, iya madah Menteri ke megai tanggungpengawa ba Pelajar, Sains enggau Pansik Teknologi, Dato Sri Michael Manyin enggau tim iya deka ngaduka sekula ke ditemu balat jai.

    “Aku enggai meda sekula kitai ke di menua pesisir, ke udah enda ulih dikena agi, tauka udah jai, nyadi baka sekula Tahfiz di Semenanjung, laban bisi sekula ke enda likun agi alai nembiak, ka pan enda, kitai deka ngaga rumah sekula nya baru…ke nyadi pemerat pengelikun nembiak sekula nya berat” ku iya.

    Iya madah munyi nya lebuh bejaku ba aum media pengudah muka sekula Sekula Primari (SK) Landeh semak ditu, kemari.

    Ba lansa bukai Abang Johari ti mega nyadi Menteri Wang enggau Perambu Ekonomi madahka, Opis Menteri Pelajar, Sains enggau Pansik Teknologi Sarawak enggau Opis Pelajar Sarawak (JPNS) enda tau enda beratika pelajar STEM (Sains, Teknologi, Injinia enggau Matematik) nya berat.

    “Enti kitai deka ngelatih nembiak kitai ke nyulut dalam STEM, sekula kitai enda tau enda bisi makmal ke menyana. Pekara tu agi dalam proses pansik ulih opis menteri tu, ke deka bekerejasama enggau JPNS.

    “Reti nya, pansik dulu rumah sekula ke standard ke bisi nyendiaka makmal alai STEM, lalu udah nya ila, peratika berapa ungkus ngaga sekula ke bisi perengka guna makmal bansa nya,” ku iya seraya madah bajet ngemanahka sekula lama nyadi rumah sekula baru nyengkaum ngaga kuarters alai pengajar diau.

    Ungkup RM1 billion nya ku iya, patut dikena dalam kandang dua taun tu, lalu abis timpuh nya ila, baru Perintah Nengeri ulih minta baru.

    “Ke pemungkal iya, ungkup bajet nya kena ngaga urung 210 buah sekula lama sereta enda ulih dikena agi (daif) di Sarawak, ke patut dikena dalam kandang dua taun ari diatu,” ku iya, alai Opis Kereja (JKR) udah berengkah bejalai meda sekula tu.

    Penyampau sekula lama sereta enda ulih dikena agi (sekula lama) di serata menua Sarawak, bisi dalam 1,020 buah sekula, lalu ari penyampau nya 200 ke enda tau enda digaga enggau jampat (balat jai) nyengkaum sekula ke ngembuan kurang nembiak (SKM) deka nyadi pemerat.

    “Baka sekula ke kurang nembiak, sida ke deka bepindah ngagai sebuah sekula ke besai agi pan deka digaga manah agi nyengkaum ngaga buding ungkup sida.

    “Apai indai ke bisi anak tauka uchu sida iya belajar ba sekula ke kurang nembiak, enda dipajakka mindahka anak, uchu sida iya, tang tentu pemaik mayuh agi disediaka ba sekula ke besai agi,” ku iya.

    Ba kunteriktor ken gaga sekula tu ila, ku Abang Johari, deka diberi ngagai kompeni asal ari menua tu empu.

    “Perintah Nengeri udah besetuju, atur pengawa nya dikemujurka, wang turu diberi ngagai ‘Trust Fund’. Udah nya ila, ngaga sekula nya ari perintah nengeri enggau sebuah komiti, alai Perintah Besai sama bisi pemerat (bela ngembuan tanggungpengawa ke besai), tang pemutus ari Perintah Menua.

    “Reti nya, kita ngena model Lebuhraya Utara Selatan (LBUS), reti nya kitai bisi sitak Selatan, Tengah enggau Utara, ke semua sekula tu deka digaga dalam timpuh ke sama (ba ketiga-tiga zon) lalu deka dikemata ulih Opis Menteri Pelajar enggau JKR,” ku iya.

    Sama bisi datai, Sapit Menteri Pelajar ari Opis Menteri Pelajar Malaysia, Senator Datuk Chong Sin Woon, Menteri Pelajar, Sains enggau Pansik Teknologi (KPSPT), Dato Sri Michael Manyin anak Jawong, Sekretari Mendam KPSPT, Datu Sudarsono Osman, ADUN Batu Kitang ti mega nyadi chairman Opis Kunsil Padawan Municipal Council, Lo Khere Chiang, Sapit Kepala Direktor Opis Menteri Pelajar, Datuk Sulaiman Wak enggau Direktor JPNS Rakayah Madon. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads