AirAsia deka ngaga sektor penerebai bilun terus ari Sibu ke Kota Kinabalu. - Berita Iban Online

Header Ads

  • Baru Nyadi

    AirAsia deka ngaga sektor penerebai bilun terus ari Sibu ke Kota Kinabalu.

    RAMI: Karim (empat kanan) disempulang Wong (tiga kiba) sereta bala bukai maya bejadi Pesta Tanglung Sibu enggau Pesta Makanan 1Malaysia ba Dataran Bandar Sibu ditu, malam kilah ensana.

    SIBU: Perintah nengeri andal penerebai bilun terus entara Sibu enggau Kota Kinabalu deka dipenyadi sepengudah randau begulai enggau kompeni penerebai bilun AirAsia tembu.

    Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah, bisi tujuh bengkah sektor penerebai bilun dalam nengeri bela disengkaum dalam randau begulai enggau AirAsia nya.

    “Tujuh sektor tu nyengkaum penerebai bilun terus Sibu ngagai Kota Kinabalu. Aku andal ba pengujung randau tu deka bisi pemutus penerebai bilun terus ba dua bengkah menua tu,” pia ku iya madah.

    Iya mantaika jaku tu maya bejadi Pesta Tanglung Sibu enggau Pesta Makanan 1Malaysia ba Dataran Bandar Sibu ditu, malam kilah ensana.

    Pengerami tu diatur Dewan Perdagangan dan Perindustrian Cina Sibu (SCCCI) begulai enggau Opis Kaunsil Sibu (SMC) ti berengkah 3 nyentuk 26 Oktober tu.

    Kelimpah ari nya, Karim mega madahka nyangka penerebai bilun terus ari Sibu ngelawa Singapura bela deka dipenyadika jemah ila.

    Tang ku iya, iya minta timpuh bejadika pekara nya nengah chara ti engkeman, ngambika Sibu diungkupka penerebai terus ngelawa semua mengeri besai udah tu ila.

    “Aku semampai chakah deka meda pekara tu nyadi ukai semina ungkup Kuching aja tang nyengkaum mengeri besai di Sarawak baka di Sibu ditu.

    “Ngambika kitai bela nemu, kitai udah bisi penerebai bilun terus ari Shenzhen, China ke Kuching ti dipelabaka deka berengkah bulan Disember tu.

    “Penerebai bilun ke dua ari Fuzhou, China ke Sarawak mega nyangka deka belabuh pun taun ti deka datai,” ku iya ti mega Kaban Kunsil Nengeri (ADUN) Asajaya.

    Bekaul enggau Pesta Tanglung nya, Karim madahka pengerami nya nyadi pengerami ungkup semua raban bansa lebih agi ba nengeri tu.

    Pengerami tu ku iya, enda semina diintu raban bansa China aja tang bela dirami bansa bukai di Sarawak ditu.

    “Kitai meda pengerami tu mujur nyadi menalan alai semua pupu raban bansa ditu ulih begulai sereta nyintalka agi kaul enggau pangan diri.

    “Tu awak ke engkeman ngempung kitai baikka bebansa China, Dayak tauka Melayu,” pia ku iya madah baru.

    Pengerami tu bela digulu Menteri Dagang Antarabansa enggau E-Dagang Dato Sri Wong Soon Koh, ADUN Dudong Datuk Tiong Thai King, Residen Sibu Hii Chang Kee, Sapit Chairman SMC Rogayah Jamain, Presiden SCCI Gregory Hii, chairman pengatur pengerami Datuk Lau Chieng Kiong, Temenggung Datuk Vincent Lau sereta bala temuai ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads