Header Ads

  • Berita Tebaru

    Anak mit begunaka penyiru ari mensia

    Dato Sri Fatimah Abdullah
    Fatimah: Ulah nyadika gajet ‘penyaga’ anak mit nya deka meri empas ke enda enda manah ngagai anak mit ke timpuh panjai.

    KUCHING: Mensia mayuh dilalau ngambika enda nyadika gajet nyadi ‘babysitter’ anak mit.

    Menteri Pengintu Pengelantang Pendiau, Pengelantang Raban Bansa, Orang Indu enggau Pemansang Nembiak Mit, Dato Sri Fatimah Abdullah madah, laban nya ulih meri empas ti enda manah ngagai anak mit dalam timpuh panjai.

    Diatu isu nya dikeirauka sereta ulih ngasuh lenyau penyiru ari mensia, ku iya.

    “Pekara tu endang nyadi diatu, apai indai meri gajet ngagai anak dikena narit ati sida.

    “Ngena chara nya, sida (apai indai) ulih ngereja pengawa bukai,” ku iya.

    Fatimah mansutka pekara nya lebuh bejaku nyerumba iya bejadika Seminar ICT Dalam Pemansang Kanak-Kanak 2017 ba Pustaka Negeri Sarawak, kemari.

    Iya ngaku gajet enggau aplikasyen baru nya utai ke diguna tang apai indai patut terit serera bisi penyedar pemesai guna enggau tatak ngena.

    “Enda dikeenggaika teknologi pemadah (IT) mungkur gaya pengidup ninting hari, lalu bisi mega gajet enggau aplikasyen ti beguna ngagai bala anak.

    “Tang apai indai enda tau enda nemu ni maya ke patut ngemendarka bala anak bemain enggau gajet, ti pemadu beguna iya nya anang tekelalu ngena kereban nya,” ku iya.

    Ku Fatimah, bepelasarka pansik Akademik Pediatrik Amerika (AAP) 2010, madahka teknologi ulih meri empas ngagai pemansang pengelandik kognitif enggau rama nembiak ba pra sekula.

    Berindik ari nya, iya madahka nembiak mit ti beumur kurang ari dua taun enda tentu diasuh diberi sebarang aktiviti ba skrin gajet baka telefon enggau tablet.

    “Nembiak mit ti beumur lebih dua taun, sida patut bisi sekat ngena telefon pintar tauka tablet ti enda lebih ari dua jam ninting hari lalu isi dalam nya patut disarap,” ku iya.

    Fatimah madahka ubah pelajar nengah revolusyen IT udah tentu meri pemar ngagai kredibiliti apai indai enggau pengajar.

    Tang ke pemadu beguna ku iya, meri peluang ngagai anak ngena teknologi ICT patut sebela.

    Ba licha nya, tiga pengelicha khas berandauka topik enggau isu bekaul pemar ditapi nguna ICT ba pemansang tumu nembiak mit ke baruh ari umur enam taun.

    Sida nya, Pakar Pediatrik enggau Neonatologis Pusat Perubat Normah, Dr George Ting, Psikiatrik Anak Mit enggau Nembiak Sepital Besai Sarawak (HUS), Dr Selvasingam enggau Pengajar Jailani yatim ari Sekula Sekondari Sri Aman.

    Sama bisi datai, Ketuai Kaunsil Pemansang Anak Mit, Dr Siti Zaleha Riduan. #UtusanBorneo

    No comments

    Post Top Ad