Anang beguai arapka berita PRU14 sitak Selangau. - Berita Iban Online

Header Ads

  • Baru Nyadi

    Anang beguai arapka berita PRU14 sitak Selangau.

    KUCHING: Menteri di Opis Menteri Besai, ti mega Kaban Parlimen (MP) Selangau, Datuk Joseph Entulu anak Belaun madahka iya enda kiruh sereta enda irau ati ke jaku tempa mensia mayuh madahka Parti Rakyat Sarawak (PRS) ngenggaika iya nyadi chalun di Selangau, maya Pengawa Bepilih Besai ke-14 (PRU14) tu ila.

    Iya madah munyi nya lebuh nimbal berita sereta jaku Presiden PRS ti mega Sapit Kepala Menteri, Tan Sri Datuk Amar James Masing, ke nadai nyengkaum nama iya dalam lis chalun PRU14 ti deka di atur enda lama agi.

    "Rambau PRU12, nama MP Sri Aman, Datuk Masir Kujat kenu ku berita, pan dipadah enda disengkaum dalam lis chalun lebuh nya, tang iya agi dipilih nyadi chalun BN.

    "Nya alai, aku enda irau ati tauka enggai ibuhka cherita dikerembai sebedau PRU 14. Aku deka majakka pengawa aku gawaka rayat enggau naka ulih," ku Entulu madah nengah WhatsApp nyaut Pengarang Berita ari Utusan Borneo.

    Ba siti atur pengawa ujung minggu siti nyin tadi, Masing lebuh dikerandau pasal lis chalun, ke nadai nyengkaum nama iya ngetanka kerusi parlimen Selangau, ke udah dianjung ngagai Kepala Menteri ti mega nyadi chairman Barisan Nasional (BN) Sarawak, Datuk Patinggi Abang Johari Tun Openg enggau Menteri Besai ti mega nyadi Presiden BN, Datuk Seri Najib Tun Razak madahka ari enam kerusi ungkup PRS, semina empat aja ke udah ditetapka, lalu sitak Lubok Antu enggau Selangau aja ke lalu bedau netapka chalun di sitak nya.

    Taja pia, Masing madah dalam lis chalun nama nya, nadai nama chalun ke Parlimen Lubok Antu enggau Selangau laban bedau nerima sukung ari Kaban Kunsil Nengeri (ADUN) kelebih agi ari PRS di kededua sitak nya.

    Ba lansa bukai, chalun ke empat kerusi Parlimen diungkup ngagai PRS ti udah ditetapka, iya nya Datuk Joseph Salang Gandum (Julau), Aaron Dagang (Kanowit), Wilson Ugak Kumbong (Hulu Rajang) enggau Datuk Masir Kujat (Sri Aman).

    Entulu nyadi Kaban Parlimen Selangau lebuh iya menang bediri nyadi chalun Parti Bansa Dayak Sarawak (PBDS) maya PRU ke-11, ngalahka chalun SNAP Liman Sujang.

    Berindik ari nya, Entulu masuk nyadi PRS, pengudah PBDS dikinsil dalam taun 2004, lalu diatu benung mangku pengawa nyadi Sapit Presiden PRS.

    Maya PRU ke-12 (2008), Entulu dichalun baru lalu menang darat, lalu nangkan nya, iya diasuh bediri baru ngetanka kerusi Selangau maya PRU ke-13 (2011) lalu mujur ngalahka chalun Parti Keadilan Rakyat (PKR) Joshua Jabeng, lebuh iya mujur teulihka undi 12,040 undi lalu Jabeng semina bulih 3,891 undi.. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads