Anang guai nyalahka sida ti ditan SPRM. - Berita Iban Online

Header Ads

  • Baru Nyadi

    Anang guai nyalahka sida ti ditan SPRM.

    KUCHING: Menteri Pengatur Pengereja Pengawa (KSM), Datuk Seri Richard Riot Jaem minta mensia mayuh anang guai ngumbai orang ke ditan Opis Nagang Pengawa Makai Suap Malaysia (SPRM) nya salah laban sida deka mantu tasat pasal pengelesap duit ke diungkup ngagai Wang Turu Kaunsil Pemansang Pengelandik.

    “Sesiku orang nya mengkang enda salah nyentuk ke amat ditemu salah. Enti semina ditasat aja, ukai reti nya orang nya amat salah. Mayuh orang ngumbai lebuh orang nya ditanka SPRM sida lalu madahka ‘orang nya bisi ngaga penyalah’. Ukai pia,” ku iya madah lebuh dikerandau di Kajang, kemari.

    Riot dipinta mantaika penemu bekaul enggau lima iku suspek ke ditangkap, nyengkaum seiku nya sekretari politik iya empu, ngambika ulih mantu bekaul enggau pengelesap wang turu ke diungkupka ngagai wang turu Kaunsil Pemansang Pengelandik .

    Kepala Komisionyer SPRM Tan Sri Dzulkifli Ahmad madahka SPRM udah nangkap siku sekretari politik Hari Tiga tu tadi, urung pukul 12.30 tengahari.

    Dzulkifli madahka sekretari politik nya, nyadi orang ke 5 ditan SPRM ngambika mantu tasat bekaul enggau wang turu ke dilesap nya.

    Kena 13 September tu tadi, SPRM udah nangkap empat iku orang ke dipadah udah ngelesapka duit perintah ke sepenyampau RM40 juta, ke patut diberi ngagai kaunsil pengelandik ungkup program latih.

    Sida ke ditan SPRM iya nya seiku orang bepangkat ‘Datuk’ berumur 58 taun, nyengkaum sekretari korporat, 34; pemantu pegawai wang, 32 sereta seiku direktor kompeni, 38 ba sekeda bengkah endur indu nengeri dalam sebengkah operasyen di Bandaraya Kuala Lumpur.

    Semua empat iku nya ditan pengelama enam hari berengkah ari 14 september tu tadi datai nyentuk ke sida dilepas nengah jamin SPRM.

    Bekaul enggau ke pemadu baru ditangkap tu, Riot madah sekretari politik iya semina dipinta SPRM mantu nasat kes nya.

    Taja pan betapi kes nya, tang Kaunsil Wang Turu Pemansang Pengelandik dibuka baka selama.

    “Sekalika agi bisi orang bukai ke deka ditan, aku enda nemu. Enti nitih, lebuh pekara tu keterubah dibantaika, aku bisi mansutka penerang madahka kami semua tekenyit magang. Sekretari besai opis menteri aku ti madah ngagai aku,” ku iya.

    Taja pia, Riot madahka opis menteri iya ngemendarka SPRM nasat kes nya lalu deka meri kerejasama penuh.

    “Awakka SPRM nasat lalu opis menteri tu deka meri kerejasama penuh,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads