Anang semina ngandal belanja diberi perintah - Berita Iban Online

Header Ads

  • Baru Nyadi

    Anang semina ngandal belanja diberi perintah

    PIBG patut berunding alternatif dikena nukar perengka guna di sekula ke udah buruk.

    LONG PILLAH, Baram: Apai indai enggau pengajar di sekula ba sitak Telang Usan patut ngiga chara alternatif kediri empu ngemanahka penyikap perengka guna dikena ngadaka rampa belajar ti kondusif sereta likun.

    Kaban Kunsil Nengeri (ADUN) Telang Usan, Dennis Ngau madah, kebuah pia laban ungkus mudah agi sereta efektif dibanding nganti agih belanja perintah dikemendar, begunaka timpuh ti lama.

    “Kitai enda ulih seruran nganti belanja ari Putrajaya lalu nejuka semua kereja ngemanahka perengka guna ngagai perintah aja.”

    “Nya alai, apai indai enggau pengajar nengah Gerempung Apai Indai enggau Pengajar (PIBG) patut bekerejasama ngatur pengawa beripai sereta ngiga belanja dikena ngemanahka perengka guna sekula,” ku iya lebuhka bejaku bejadika Hari Lumba Ninting Taun Sekula Primari (SK) Long Pillah ke-68, apin lama ke udah.

    Ku Dennis nambah, sitak Telang Usan aja bisi 22 buah sekula primari lalu tu enda nyengkaum sekula sekondari.

    Nya alai ku iya, tetiap sekula lama nganti agih belanja ketegal pemayuh sekula kelimpah gaya tanah enggau menua di Telang Usan.

    “Berindik ari nya, aku merambu ngagai PIBG ransing gawa ngumpul belanja sereta ngaga kereja ngemanah, ngangkat manah perengka guna sekula nengah pengawa beripai laban iya jauh mudah lalu ulih tembu enggau jampat,” ku iya.

    Iya mega muji sereta nerima manah pengawa dipejalaika Opis Menteri Pelajar, Sains enggau Pemansik Teknologi, jampat agi ngemendarka geran dikena mutarka penanggul enggau pemar ditapi sekula menua pesisir enggau menua ulu.

    Dennis mega bisi ngelancharka Program Imersif Tinggi enggau pagar sekula.
    Sama bisi datai Kepala Pengajar Jaxz Aingle Liang, Chairman PIBG Surang Jok, Ketuai Raban Bansa Saging Wan Lah sereta Kaunsilor Jau Emang. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads