Apai indai ditangkan anang sengapa nguna bantu pelajar ari YS. - Berita Iban Online

Header Ads

  • Baru Nyadi

    Apai indai ditangkan anang sengapa nguna bantu pelajar ari YS.

    MIRI: Apai indai ditangkan ngambi nguna bantu pelajar ke diberi perintah enggau manah lalu anang ngayahka iya sengapa.

    Sapit Direktor Yayasan Sarawak Ellen @ Manium Engang madah, bantu nya dikena nentuka bala anak ulih besekula enggau meruan.

    “Baka sehari tu (ensanus), kami meri bantu tu asil ari insiatif perintah nengeri nengah Yayasan Sarawak (YS) mantu sereta nentuka rayat seruran dikemerat.

    “Rintai nembaik ke nerima mega dipilih ari data e-Kasih iya nya udah ditapis ba renggat sekula sereta aum Focus GroupDaerah nya.

    “Kelimpah nya, enda leluba nyema aku madah bantu baka tu patut dikeingat. Nya alai, kena enggau manah-manah,” ku terang iya.

    Iya ngarika Direktor Yayasan Sarawak Azmi Bujang madah munyi nya rambau pengawa nyuaka Baucher Bantu Pekayan Beragam Sekula Yayasan Sarawak ke diatur ba di SMK Merbau ditu ensanus.

    Pengawa nya dipenyadika Menteri Muda Dagang Temuai, Seni enggau Main Asal Datuk Lee Kim Shin.

    Sama bisi datai Residen Bagi Menua Miri Sherrina Hussaini, Pemesai Pelilih Menua Miri Abdul Aziz Yusuf, Sapit Pemesai Opis Pelajar Pelilih Miri Alias Ngah sereta temuai ke bukai.

    Ellen mega minta kedai pekayan beragam sekula nyendiaka pekayan sekula ke bisi kualiti enggau penyampau ke chukup setipak enggau rega baucher nya.

    “Sida (tauke kedai) enda patut beambi ulih nengah program nya lalu apai indai mega patut meresa pekayan beragam ke diberi ngena baucher nya nitihka pematut,” ku iya seraya madah baucher nya semina ulih dikena sebedau 30 November tu.

    Berebak enggau nya, Lee ba jaku iya madah bantu ke diberi nya dikena meri peransang ngagai bala nembiak ngambika belajar bebendar.

    “Nengah bantu baka tu, dikearap ulih meri peransang ngagai bala nembiak belajar bebendar, kelimpah ngurangka tating belanja apai indai ke meli kereban belajar ungkup bala anak sida,” ku iya.

    Urung 304 nembiak konstuensi Senadin (211 nembiak­) enggau Pujut (93 nembiak) bela nerima baucher nya ensanus.

    Nembiak nya bela datai ari 17 sekula primari enggau sekondari nyengkaum sekula China ba Senadin enggau Pujut. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads