Header Ads

  • Berita Tebaru

    Apai indai orang ti keterubah nerenak pelajar ngagai anak

    Majang Renggi
    BINTULU: Pelajar bala anak iya nya bepun ari rumah lalu apai indai nyadi orang ti keterubah ngajar anak sida sebedau pengawa ngajar dilempai ba bala pengajar.

    Kaban Kunsil Nengeri (ADUN) Samalaju, Majang Renggi madah sentang pengawa meri pelajar di rumah, apai indai meseti ngayanka chunto ti manah ba mua bala anak ngambika sida besai dalam pemaik enggau penyiru sereta pengelantang.

    Ku iya, entara chara dikena nyeridi bala anak iya nya ngelimpangka mayuh agi jam begulai enggau sida sereta nerenakka kreativiti bala anak dikena ngangkatka penau runding seraya ngeregaska runding sida.

    “Nya kebuah penatai apai indai ba pengerami ke bansa tu beguna endar ngambika bala anak ngasaika diri seruran bisi sukung enggau disiru kelimpah ulih bekunsika kenang begulai enggau apai indai sida,” ku iya.

    Iya mansutka jaku nya lebuh bejadika Pengerami Mini Konvokesyen Tabika enggau Taska Permata KEMAS Ke-34 Parlimen Bintulu di Dinner World, Bintulu Sentral edau lama.

    “Aku berasai temegah ati meda mayuh apai indai datai ngelimpangka hari diri meri sukung ngagai bala anak sida,” ku iya.

    Ku Majang, bala pengajar enggau staf Opis Pemansang Mensia Mayuh (KEMAS) Bintulu, aku meri pengaga ati ngagai kita laban betaun udah gawa enggau nyeridi bala anak.

    “Perintah sedarka pekara pangku pengawa enggau tanggungpengawa ti besai endar disan bala pengajar KEMAS, nya kebuah perintah deka terus meri awak ngagai sida ngangkatka tikas profesionalisme nengah atur bengkel, latih, kus tauka seminar ti setipak ninting taun,” ku iya.

    Kelimpah ari nya, iya muju KEMAS Bintulu ti dipadu bulih gelar champion Pekit Anugerah Pemaju Masyarakat (Guru) Inovatif Renggat Nengeri Sarawak lalu deka ngarika Sarawak ngagai pekit ke sama di Renggat nasional ujung bulan tu (Oktober).

    “KEMAS Bintulu mega bulih champion ba Pekit Gerak Kreatif dan Rounders Renggat Zon di Miri kena 3 enggau 4 Ogos tu tadi,” ku iya.

    Dulu agi ari nya, bisi 1,064 nembiak mit Tabika enggau Taska Permata KEMAS mungkur sitak Bepilih Kunsil Nengeri (DUN) Jepak, Tanjung Batu, Kemena enggau Samalaju nerima setipikit abis pra sekula sida empu lalu 544 iku ari sida nya dipaduka nyulut ba akademik dalam Modul Saringan Pengayaan dan Pengukuhan (MSPP).

    Berebak enggau nya, Pemesai KEMAS Bintulu, Nooreffariza Awang Muslaini ti ngarika Direktor KEMAS Sarawak madahka pemesai guna kurikulum pelin transformasyen menua pesisir Opis Menteri Pemansang Menua Pesisir enggau Kandang Menua (KKLW) meri pemerat ba pekara modal mensia nengah pelajar tumu nembiak mit.

    Ku iya, tu dikena ngasuh Tabika KEMAS dipilih apai indai lalu KEMAS ngemeratka pelajar tikas tinggi ti ngaum program meretika pelajar Islam, patriotisme enggau ke bukai.

    Ku iya, perintah mega meri agih belanja nangkup peminta bala nembiak mit nerima pemakai tambah tetiap hari besekula, nentuka bala nembiak mit nerima pemakai ti sebela, ulih nambahka pemesai tubuh sereta ngemanahka penau runding sida.

    “Bala nembiak mit tu dikerembai ba bemahcam pekara ari KEMAS, enda semina ditatak ba penyapai akademik aja taja iya berat, tang pengawa nempa pemanah ulah mega dikemerat dikena meri awak bala nembiak mit ngambuh pengulih diri sekalika dalam bidang lumba tauka panggau,” tambah iya. #UtusanBorneo

    No comments

    Post Top Ad