Header Ads

  • Berita Tebaru

    Apai indai patut nerima atur perintah nyerakupka SKM

    UNGKUP KITA: Dr Rayong nyuaka chek MRP ngagai Jeffery (lima kiba) seraya dikemataka Nyambong (tiga kiba), Donnie (empat kiba), Presley sereta bala pengajar SK Basi ba Balai Mayuh Guna Engkilili, kemari.
    Pemutus tu ukai deka nusahka nembiak enggau apai indai tang ke pemaik institusyen pelajar.

    ENGKILILI: Apai indai patut mereti enggau terang tuju perintah nyerakupka Sekula Kurang Nembiak (SKM) nyadi sekula besai laban nya ukai ditempa sengapa, ku Kaban Kunsil Nengeri (ADUN) Engkilili Dr Johnical Rayong Ngipa.

    Ku terang iya, pemutus tu mega ukai deka nusahka nembiak enggau apai indai tang kebendar ke pemaik pelajar enggau institusyen pelajar ba nengeri tu.

    “Aku ngelalau pengajar nyengkaum apai indai beri penerang ke betul bekaul isu SKM laban nya entara pemutus ke pemadu berat sereta tusah deka digaga perintah lebih agi opis menteri pelajar, pengari rayat sereta Opis Pelajar Nengeri,” ku iya.

    Iya madah munyi nya rambau bejadika Pengerami Merarau Gerempung Apai Indai enggau Pengajar (PIBG) Sekula Primari (SK) Basi, Batang Ai Ili, Skrang ba Balai Mayuh Guna Engkilili, pasar Engkilili ditu kemari.

    Tambah mega, iya enggau sekeda pengari rayat bekaul SKM terubah iya kurang setuju enggau pengawa nyerakupka nembiak laban mayuh pangka pekara deka nyadi.

    “Entara nya nembiak ke agi biak jauh ari apai indai, ngerua infrastruktur sekula, ngengkah staf sekula lebih agi kepala pengajar enggau penulung kanan enggau isu bukai ke bekaul.

    “Tang pengudah ngulu sekeda program penerang ke bela digulu menteri iya, Dato Sri Michael Manyin Jaong, pengari rayat, pengari JPN sereta piak bekaul SKM, pengujung iya penemu ke sebaka diambi iya nya mindahka sekula kurang ari 150 iku nembiak,” ku iya seraya madah pengawa tu deka berengkah dipejalai bulan Febuari taun baru.

    Ku iya, ba DUN Engkilili entara sekula ke deka diatur iya nya nembiak SK Ridan berakup enggau SK San Semanju, udah nya nembiak SK Ng Menjuau deka dipindah ngagai SK Ng Entalau.

    Nerang silik iya minta pengajar berundingka chara pemadu manah nerenakka pengerindu nembiak belajarka jaku Inggeris laban nya jaku antarabansa ke semampai diguna.

    “Sehari tu nembiak lebih agi ba menua pesisir puntan nemu bejaku ribai lalu tu ngerampit ngagai bala graduet ke ngujungka sida puntan besemekih maya bepintaka pengawa”.

    “Anang malu bejaku ngena Inggeris lalu belajar ari pengilap ayat awakka kitai tau pandai jemah, lalu nya ukai reti kitai enda ibuhka jaku Malaysia laban nya endang jaku bahasa kebangsaan sereta diguna ninting hari,” ku iya.

    Dr Rayong mega ngelansa pasal pemesai guna belajarka subjek Sains enggau Matematik nyengkaum subjek vokasional dikena nangkup makit pengawa landik enggau jelan pengelandik manggai taun 2030.

    Ba pengerami nya, Dr Rayong bisi ngungkupka geran Projek Mit Pemansang Menua Pesisir (MRP) penyampau RM3,000 ngagai PIBG SK Basi dikena sida ngatur program.

    Sama bisi datai iya nya pengari Opis Pelajar Lubok Antu Presley Mawan, Kepala Pengajar Jeffery Rigie, YDP Donnie Empusul, bala pengajar, ketuai raban bansa enggau apai indai nembiak. #UtusanBorneo

    No comments

    Post Top Ad