APMM Kuching udah nangkap dua perau berikan ari Vietnam. - Berita Iban Online

Header Ads

  • Baru Nyadi

    APMM Kuching udah nangkap dua perau berikan ari Vietnam.

    ASIL BERIKAN: Orang berikan Vietnam ke ditan ngayanka sekeda ikan ke bisi ba dalam perau.

    KUCHING: Dua perau berikan ari menua Vietnam ditan Ejensi Penerit Maritim Malaysia (APMM) Pelilih Kuching kena 30 September urung pukul 10.40 pagi.

    Kededua perau nya ditan urung 150 Batu Nautika ari Tanjung Po, Kuching lalu dibai ngagai jeti Kompleks Maritim Tun Abang Salahuddin (KOMTAS), Muara Tebas.

    “Dua perau berikan Vietnam dipeda lalu ditan maya berikan ngena pukat ‘tunda gading’ kena 30 September urung pukul 10.40 pagi.

    “Lebuh diperesa, kededua kapal nya mai 19 iku orang berikan sereta seiku tekong,” ku Direktor Pelilih Maritim Kuching Kapten Maritim Shahref Steve Mac Queen Abdullah ba aum pengarang berita di Jeti KOMTAS kemari.

    Nitihka penerang ari Shahref, kededua perau berikan nya ngundan urung 21 tan ikan lalu dipelaba berega entara RM50,000 nyentuk ngagai RM60,000.

    APMM nganggar mujur ngerampas lebih RM2 juta ketegal seiti perau nya berega RM1 juta, tandu Shahref.

    Shahref nambah, semua 20 iku orang berikan Vietnam ke ditangkap deka ditan riman lalu kes ditasat nengah Akta Perikanan 1985.

    “Enti ditemu salah, perau nyengkaum perengka berikan tau disita ke alai tekong enggau 19 iku nya diukum enda lebih ari RM1 juta enggau RM100,000 seiku nyengkaum ukum sipat sereta jil,” ku tandu Shahref.

    Iya mega madahka nyentuk ngagai 2 Oktober 2017, 34 iti kapal berikan ari Vietnam udah ditan lalu nya mandangka pemujur Maritim Pelilih Kuching ti bejalaika tanggungpengawa enggau komited. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads