Header Ads

  • Berita Tebaru

    Bajet 2018 bajet ti holistik, strategik enggau progresif, ku Chairman MTUC Sarawak

    Logo MTUC
    KUCHING: Kongres Kesatuan Sekerja Malaysia (MTUC) nganggap Bajet 2018 iya nya bajet holistik, strategik enggau progresif.

    Chairman MTUC Sarawak Mohamad Ibrahim Hamid madahka bajet nya lebih mekuh sereta mungkur pengereja pengawa sektor perintah dibandingka enggau sektor peribit.

    “Kami (MTUC) gaga ati ke pengereja pengawa sektor perintah laban perintah udah nyendia tauka ngamatka peminta enggau guna sida taja pan enda mungkur semua pekara.

    “Tang, ninting taun bajet kurang mantu pengereja pengawa ba sektor peribit, lalu ba Bajet 2018 tu mega nadai bisi nguing ngagai sektor peribit.

    “Penyampau pinchin pemadu baruh iya nya RM1,000 udah ditumbuhka ungkup orang pinchin opis perintah ke gawa ambis nadai 25 taun, tang orang pinchin ke kala gawa enggau sektor perintah sebedau tu ke udah diperibitka enda diperundingka tauka enda disengkaum. Sida nya mih ke nyukung perintah bejalaika ‘polisi penswastaan’ perintah suba,” ku iya.

    Ibrahim mansutka pekara nya lebuh ke dipinta meri penerang bekaul enggau Bajet 2018 ke dipejuraika Menteri Besai Datuk Seri Najib Tun Razak di Kuala Lumpur kena 27 Oktober tu tadi.

    “Kami nyambut manah perambu perintah iya nya ti minta sektor peribit enda tau enda nambahka kemisi beranak ari 60 hari ngagai 90 hari.

    “Laban tu semina perambu, kami ngarapka sektor peribit deka belalauka tu sereta ngemeran enggau ngemeratka nyadi polisi kompeni.

    “Sentang pekara tu pengawa ngaga tauka ngubah sekeda undang-undang ke patut diterima enggau manah ngambika perambu nya nyadi nyata,” ku iya ti mega nyadi Mandal Presiden Rangkaian Kesatuan Antarabangsa, Majlis Perhubungan Malaysia (UNI-MLC).

    Berebak enggau tu lebuh ti ngenang pasal lapan batang pekara dalam Bajet 2018, iya madahka pekara ti narit ati pengereja pengawa opis perintah iya nya pengawa berumah, pengelantang pendiau, pengawa ngenegapka orang indu, perubat, perengka pengangkut, nyaga anak enggau pelajar.

    “Kami nyambut manah sekeda perambu Bajet 2018 lalu kami semina ngarapka semua nya ulih dipejalaika enggau chakah, dikereja enggau nadai bechiping sereta diungkup ngagai orang ke patut aja,” ku iya.

    Nambahka nya iya madah anggar perintah sepenyampau RM2.2 bilion ke diungkup ngagai pengawa ngaga rumah ungkus mit sereta murah enda chukup dikena ngaga 385,900 unit, baka ke dipadahka menteri besai.

    Belanja sepenyampau RM27 bilion ungkup nyaga pengerai chukup meri peransang laban rayat ulih ngena sepital perintah lalu enda ngeluarka belanja besai dikena berubat ba sepital peribit, ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: