Header Ads

  • Berita Tebaru

    Bajet 2018 setipak enggau juluk perintah nengeri

    Sapit Kepala Menteri Tan Sri Datuk Amar James Jemut Masing
    Entara nya Perintah Besai deka nyendiaka pelajar bekualiti nyengkaum di Sarawak, ku Masing.

    KUCHING: Sapit Kepala Menteri Tan Sri Datuk Amar James Jemut Masing madahka Bajet 2018 mendingka peminta enggau guna Sarawak ti deka nyendiaka pelajar bekualiti.

    Iya bepenemu perintah menua diiring Datuk Seri Najib Tun Razak nyadi menteri besai ngemeratka pelajar menua nyengkaum di Sarawak.

    “Ungkup belanja sepenyampau RM1 bilion dikena ngemanahka sekula lama di nengeri tu, ngayanka Putrajaya nengah Najib ba pengujung iya mendingka peminta enggau guna Sarawak ti deka nyendiaka pelajar bekualiti.

    “Sebedau Najib nyadi menteri besai, pekara pelajar di Sarawak enda dikeibuh,” ku iya meri penerang ngagai Utusan Borneo nengah aplikasi WhatsApp lebuh dipinta ngenang pasal Bajet 2018 ti dibantaika Najib ba Parlimen di Kuala Lumpur, kemari.

    Nambahka nya Masing ke nyadi Menteri Pemansang Infrastruktur enggau Perengka Pengangkut bepenemu, dalam timpuh beberap taun ke deka datai Sarawak enda tau enda ngelanggur pemansang infrastruktur nyengkaum Lebuh Ekspres Kedua enggau jalai besai tebing pantai awakka ulih minta mayuh agi ungkup belanja baka jalai besai pesisir pantai ari Selangor ke Perak ngena ungkus belanja RM5 bilion.

    Iya madahka opis menteri iya jemah ila deka ngelanggur ngaga lebih mayuh agi jalai besai tauka jalai alun enggau jematan ngambika Sarawak ulih minta belanja sebaka enggau sida di Semanjung Malaysia.

    “Nya kebuah opis menteri aku ngelanggur ngaga jalai besai tebing pantai, Lebuh Ekspres Kedua enggau jematan enggau ungkus belanja semua nya enda kurang ari RM5 bilion.

    “Enti kitai enda ngelanggur enggau meri perambu, kitai nadai bulih sebarang belanja ari Putrajaya ungkup jalai enggau jematan kitai,” ku iya.

    Kelimpah ari nya lebuh ke ngenang bajet 2018 ke diungkup ngagai Sarawak, Masing madahka ungkup belanja sepenyampau RM500 juta enggau RM300 juta dikena ngemansangka jalai enggau bekal ai menua pesisir ke diungkup ngagai Sabah enggau Sarawak, nya endang manah.

    “Tang kitai deka minta lebih mayuh agi ba taun ke bukai,” ku iya lebuh ke ngenang urung RM500 juta diungkupka dikena bejalaika projek pemansang jalai menua pesisir di Sabah enggau Sarawak ke dibantaika Najib, kemari.

    Dalam Bajet 2018, Najib ngungkupka RM300 juta dikena nyendiaka bekal ai beresi ti mungkur 3,000 rumah di Sabah enggau Sarawak.

    Kelimpah ari nya lebuh ke ngenang pasal RM30 juta diungkup kena nyukat tanah adat bansa asal (NCR) di Sarawak, Masing madahka, nya ngayanka Putrajaya agi beratka peminta enggau guna nengeri tu ke deka nyukat tanah NCR ke dikeempu orang ke patut.

    “Opis Tanah enggau Survei Sarawak patut lebih chakah agi nentuka RM30 juta dipelanja ke tuju nya, lalu peranak Sarawak enda tau nagang pengawa nyukat tanah sida,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: