Bomba, MDB mujur ngatur licha napi penusah angus ba Rh Dana - Berita Iban Online

Header Ads

  • Baru Nyadi

    Bomba, MDB mujur ngatur licha napi penusah angus ba Rh Dana

    BETONG: Endang tanggungpengawa ti manah ngatur program begulai dikena nentuka atur ti patut dipejalai sereta ngaul semua raban ngemujurka pejalai program ti diungkup ngambika digulu sida.

    Sapit Chairman Kaunsil Pelilih Betong (MDB), Kunsilor Rajuna Omar muji pemanah pengawa raban Bomba laban ulih bekerejasama enggau Opis Pelilih Betong (MDB) seraya meri penerang silik ngagai bala komuniti.

    “Kitai endang ngenang pemanah pangku pengawa Bomba ti engkeman endar ba pengawa ngenataika licha.

    “Berebak enggau nya, sida mega mujur mantu komuniti menua pesisir ti kurang penemu pasal pekara pengelikun enggau chara nyeliahka penusah angus,” ku iya rambau bejaku bejadika Program Fire Point diatur di rumah panjai TR Cr. Dana Libi, Nanga Tebalau, Spak, semak ditu, kemari.

    Pia mega ku iya, program ti diatur nya beguna endar ngagai semua serak komuniti nyengkaum iya empu lalu iya rindu meda gaya enggau chara dikena pemesai ti gawa, belicha.

    “Aku deka seruran bekerejasama enggau raban Opis Bomba enggau Penyah Penusah (BBP) Betong kelebih agi, PBK1 Henry Jugah nyuap meri licha pengelikun ari penusah angus ngagai peranak di Kampung Melayu di sitak Betong enggau Spaoh ila.

    “Licha ti dikenatai chukup terang sereta manah endar lalu peranak nemu gaya napi penusah nyema bisi nyadi,” ku iya.

    Bisi lebih 200 iku peranak ari Nanga Tebalau, Spak ngulu program nya ti ngaul enam buah rumah panjai, iya nya Rh. Kalong Raba, Rh. Lana Penyelaneh Kanan, Rh. Lugat Penyelaneh Kiba, Rh. Anji Mupoh Baroh, Rh. Agan Mupoh Atas enggau Rh. Uching Tebalu Ulu.

    Program diatur MDB bekerejasama enggau JBPM Betong sereta dibantu peranak rumah panjai TR Cr. Dana Nanga Tebalau, Spak, ti nyadi tuai pengatur program.

    Dalam atur program nya, raban pengatur ngemeratka pekara Penyedar Pengelikun Penusah Angus di rumah panjai ti dikenataika Pemesai Operasyen BBP Betong, PBK1 Henry Jugah seraya pengawa mandangka chara ngerara api udah diuluka PB Abdul Kadir Sebie begulai enggau PB Edward Baka.

    Kelai pengawa nyuaka perengka pengerara api udah dipenyadika Kr Rajuna ti udah disua ngagai TR Cr. Dana Libi ngarika nembiak redak iya.

    Sama bisi datai Pemesai Khas PBB N.36 Layar, Horace Entoi, Penulung Sekretari MDB, Martina Mendut Nelson Mujah enggau Pemesai Seranta MDB, Lolita Edward. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads