Header Ads

  • Berita Tebaru

    Chukai jalai entara Malaysia-Indonesia deka dipejuraika 22 Nov

    Jalhar (tengah) meri penerang ba aum media ke bela disempulang ulih Sekretari Pelilih Menua Kapuas Hulu, Muhammad Sukri Sulaiman enggau Mandal Datuk Bandar Sambas, Hairiah SH
    KUCHING: Presiden Indonesia Joko Widodo deka nemuai ngagai Kuching berengkah ari 20 ngagai 22 November tu, deka bejuraika chukai jalai entara garis menua Kalimantan, Indonesia enggau Sarawak, enggau Perintah Menua Malaysia.

    Konsul Jeneral Opis Republik Indonesia, Jalhar Gultom ba aum media pagi tu tadi madahka Joko deka nemuai ngagai mengeri besai Kuching, betemu enggau Menteri Besai Malaysia, Datuk Seri Najib Tun Razak.

    "Presiden Joko Widodo datai ditu (Kuching) ari kangau Menteri Besai Malaysia Datuk Seri Mohd Najib Tun Razak," ku Jalhar madah lebuh dirandau ba atur program 'Wonderful Indonesia', Festival Danau Sentarum ke deka diatur ari 25 nyentuk 28 Oktober tu di Kapuas Ulu, Kalimantan Barat.

    Beserimbai enggau penemuai nya, 'World Islamic Economic Forum' (WIEF) bela deka di atur di Kuching ke alai Presiden Indonesia nya enggau Najib mega sama deka ngulu forum nya di Palan Konvensyen Borneo Kuching (BCCK).

    Kena 22 November, Najib enggau Joko deka baum pasal 'Annual Consultation Malaysia - Indonesia' antara jurai ke deka dibai ngagai aum nya bekait enggau chukai jalai pengangkut tama enggau pansut ari kededua garis menua Sarawak-Kalimantan.

    Naka kediatu, semina kerita ke mansa garis menua Entikong-Tebedu ke dikemendarka pengangkut ari kededua sitak nya ulih mai kerita sida iya tama enggau pansut ari kededua buah menua.

    Taja pan Sarawak ngembuan mayuh jalai tama pansut ari menua tu tauka ari Kalimantan, semina Entikong-Tebedu aja ke ngemendarka kerita ngena chukai jalai.

    Jalai tama pansut ngagai/ari menua tu enggau Kalimantan, ti dikemendarka bisi tiga penama, iya nya ari Aruk (Biawak, Lundu), Badau (Lubok Antu) enggau Entikong (Tebedu, Serian). #UtusanBorneo

    No comments

    Post Top Ad