DAP Sarawak nyukung ‘Oktoberfest’ digaga di nengeri tu: Chong. - Berita Iban Online

Header Ads

  • Baru Nyadi

    DAP Sarawak nyukung ‘Oktoberfest’ digaga di nengeri tu: Chong.

    KUCHING: DAP Sarawak nyukung pemutus Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah ti madah Sarawak nadai penanggul ngadu ‘Oktoberfest’.

    Chairman DAP Sarawak, Chong Chieng Jen minta Opis Menteri Dagang Temuai Sarawak suah agi ngundang kompeni pengatur pengawa enggau kompeni pemansut ‘beer’ antarabansa ngaga pengerami di Sarawak.

    “Naka pemeli sekeda ejensi di Semenanjung Malaysia nagang ‘Oktoberfest’ enggau ‘Better Beer Fest’ ke alai polis udah diasuh nagang program renggat antarabansa nya.

    “Tu mandangka menua tu nengah perintah UMNO/BN begempung enggau PAS, ngembing menua tu ngambika lebih ektrimis agi lalu nadai berundingka orang bukai.

    “Pengerami ke suah diintu ninting taun diatu dipeda gempung UMNO/BN/PAS baka ke ‘taboo’,” ku Chong nengah surat penerang berita bedau lama.

    Di Selangor tajapan perintah Pakatan Harapan (PH) udah ngemendar pengerami nya diatur, Chong madah polis nengah perintah ari Sapit Kepala Menteri Datuk Seri Dr Ahmad Zahid Hamidi masuk champur nagang pengerami diatur.

    “UMNO diatu baka ke nunda ulah PAS ti ektrimis,” ku iya nambah.

    Chong ke mega MP Bandar Kuching enggau ADUN Kota Sentosa minta Sarawak Tourism Board (STB) beambi ulih ari pemutus perintah UMNO di Semenanjung Malaysia lalu ngundang kompeni ke bekaul nya ngadu pengerami di Sarawak.

    “Ninting taun, Oktoberfest matak 6 juta temuai datai ke Munich ngambi bagi ba pengerami pengelama 16 hari nya.

    “Tu ukai pengerami sengapa, tang mai penatai pemisi,” ku iya.

    Chong pechaya enti pengerami nya diatur di Sarawak, makit dagang temuai di Sarawak deka majak besai kelimpah ti ulih mandangka ngagai Semenanjung Malaysia sentang pemaik kaul entara genap pupu bansa di nengeri tu.

    Kelimpah ngelakuka ‘Beer Festival’, Chong minta Opis Menteri Dagang Temuai bela ngelaku Tuak Sarawak.

    “Kitai bisi mayuh raban orang ke landik ngaga macham bengkah tuak lalu tau dikelaku nengah ‘Tuak Festival’.

    “Enti Festival Tuak enggau Tuak Sarawak mujur dikelaku ba menua luar, tu ulih muka peluang dagang ngagai peranak nengeri tu,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads