DE nyungkak tikas ekonomi rayat menua pesisir. - Berita Iban Online

Header Ads

  • Baru Nyadi

    DE nyungkak tikas ekonomi rayat menua pesisir.

    KUCHING: Perintah Nengeri Sarawak bendar ngemansangka sosio ekonomi nengah Ekonomi Digital (DE),dikena ngubah ekonomi menua pesisir.

    Sapit Kepala Menteri Datuk Amar Douglas Uggah Embas madah, pengawa tu berat laban kitai enda tau enda beratika menua pesisir patut dikemansangka ba ekonomi nengah semua program pemansang sosio ekonomi.

    “Kepala Menteri Datuk Patinggi Abang Johari Tun Openg mega netapka pengawa betanam betupi di menua pesisir patut dikemansangka,laban diatu perintah nengeri benung ngaga ubah di menua pesisir.

    “Bida pemisi di entara mensia mayuh di mengeri enggau menua pesisir diatu ba tikas ke ngirauka ati, laban bida pemisi nya kelalu besai. Nya kebuah kitai, enda tau enda ngiga jalai mutarka penanggul tu,” ku Uggah.

    Iya madah munyi nya lebuh bejaku bejadi Aum Besai Setaun Sekali Serakup Gerempung Orang Bumai sereta Betupi Sarawak (PPNS) di sebuah hotel ditu,ensanus.

    Bedau lama tu tadi ku iya, Perintah Menua bisi ngaga aum entarabansa bepelasarka pengawa betanam betupi 2017 ngambika menua tu ulih ngiga chunto di menua bukai nyengkaum di Semenanjung Malaysia, beratika bagi chunto tauka model ke ulih dikena ngemansangka ekonomi menua pesisir.

    “Bisi siti keretas kereja ke digaga orang Vietnam, iya nya mantaika chara moden pengawa betanam betupi ke dikena Vietnam berengkah ngubah pengawa betanam betupi sida ba taun 1987 nyentuk ke diatu, chukup maju dataika sida ngaga pengawa betanam betupi nya ngena teknologi tinggi Industri 4.0.


    “Reti nya, iya ngena pengawa betanam betupi berubah baka teknologi ke ulih dikena. Enti dibanding enggau kitai di Sarawak, kitai agi dalam renggat Industri 1.0 ngagai 2.0 (baru berengkah enggau ‘mechanisation’ tang ba sentang digital, lalu bedau. Tu mih bida menua ke udah maju,” ku iya.

    Uggah ti mega Menteri Pengawa Betanam Betupi Moden, Tanah Adat enggau Pemansang Menua Pesisir madah tu siti ubah ke digaga kabinet perintah nengeri ke bepelasarka pengawa ngemodenka pengawa betanam betupi majak manah.

    “Reti nya, chukup ngena teknologi betanam betupi bemacham ti betul sereta ulih dikena.

    “Enti dibanding enggau kitai di Sarawak, kitai agi ba renggat 1.0 ngagai 2.0, iya nya baru berengkah ngena mekanisme tang digital lalu bedau. Tu bida entara menua ke udah maju. Tu mih tuju ke deka dikemansangka kitai,” ku iya.

    Ku iya, mayuh macham atur udah digaga perintah ila, nya alai pemansang tu deka nyengkaum PPKNS enggau Serakup Orang Bumai di kandang Menua (PPK).

    “Bedau lama tu tadi, siti ubah ke udah dikemendarka kabinet, siti pengawa kena ngemanahka agi subsidi sereta dalam timpuh ke sama nya mega, meri kuasa ngagai orang bumai kitai, ke alai Opis Betanam Betupi (JPNS) udah nganjung siti manual baru dikena ngaga magi subsidi di Sarawak,” ku iya.

    Berengkah ari taun tu, skim tu deka mungkur pemayuh penyereta, reti nya enti sebuah rumah panjai, tauka kampung bisi 50 penyereta, sida oya diasuh ngaga sebuah Komiti (Management) Projek (PMC), lalu sida iya ulih milih entara pemesai nya ba entara sida iya, numbuhka siti komiti ngambika ulih muka PPK, lalu pengawa sida semina ngaga atur pengawa, baka ngulihka subsidi getah.

    “Lalu sida tu nangkan nya diasuh mutarka projek nya ngiga kuntriktor. Nama kebuah kitai betatika ngiga kunteriktor, laban tu siti penanggul ke besai ditapi kitai lebuh ngaga program subsidi kitai termasuk subsidi getah,” ku iya.

    Dalam Langgur Malaysia ke-10 (RMK ke-10), Sarawak mujur ngaga urung 53 peratus ari ungkup nya disediaka.

    “Dalam timpuh ke sebaka nya mega, urung 53 peratus, enda mujur digaga kunteriktor, nya kebuah kitai deka ngena sistem baru, ke alai orang ke ngatika diri, ungkup nya datai ari Perintah Besai, dibagi enggau PPK,lalu nengah nya ila, deka mayar PPNS laban udah ngaga kebun nya,” ku iya.

    Ba lansa bukai, iya madah Kepala Menteri madahka Sarawak ulih nyadi sitak menua ke eksport pemakai tauka nyual produk keluar ari menua tu.

    “Nunda ku SPU (Unit Perambu Menua) tanah kita luaws, urung 2 juta hektar tanah ke ulih dikemansangka (laban pemayuh mensia ke diau di menua tu udah manggai urung 3 juta,” ku iya.

    Nya kebuah ku iya, Kepala Menteri meransang teknologi baru enda tau enda ngena dikumbai pengawa betanam betupi ke betul ngambika kitai ulih nyapai peneka perintah.

    Di Taiwan ku iya, nadai agi ngena chara betanam betupi chara lama.

    “Orang bumai enggau betanam betupi nadai agi megai changkul, tanah tang ngena IOT (Internet of Thing) ke semina ngereja pengawa sida ngena telefon binching aja meratika baja chukup tauka enda, ai chukup tauka enda tauka produk nya nambah tauka enda.

    “Sida ke betenam betupi ba Taiwan pengawa ke berat ba menua nya, laban sida tu ukai semina orang ke bumai tauka betupi aja tang orang dagang, ke ngembuan pemisi urung RM10,000 sebulan.

    “Nambah enggau nya, gerempung tauka serakup orang bumai sereta betupi ngembuan kaul ke manah nyentuk ke ulih bejalaika pengawa dagang sida iya, lalu ukai semina ngarapka tinda aja,” ku iya, ke meransang PPK di Sarawak dalam siti pelilih menua tau ngambi peluang bansa tu.

    Sama bisi ngulu atur pengawa nya kemari, chairman PPS, Datuk Sylvester Entrie anak Muran, Menteri Muda Pemansang Tanah Adat Sarawak Datuk Roland Sagah Wee Inn, Menteri Muda Pengawa Betanam Betupi Dr. Abdul Rahman Ismail, sapit Chairman, Serakup Orang Bumai sereta Betupi Kebangsaan (NAFAS - Pertubuhan Peladang Kebangsaan), Sapit Ketuai Direktor Pemansang Lembaga Serakup Orang Bumai sereta Betupi, Hamzah Bahari enggau Sekretari Mendam (KPPTAPWS) ti mega nyadi wakil Pengerejista PPS, Buckland Bangik. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads