Dennis: Komuniti patut meri puji ke pengajar ti meri servis di menua ulu - Berita Iban Online

Header Ads

  • Baru Nyadi

    Dennis: Komuniti patut meri puji ke pengajar ti meri servis di menua ulu

    LONG SAN, Baram: Pengiruh enggau pengeransing bala pengajar ti dianjung gawa ngagai menua ulu kelebih agi di Baram nerima basa sereta dikenang Kaban Kunsil Nengeri Nengeri (ADUN) Telang Usan, Dennis Ngau.

    Kebuah pia ku iya, ukai muntang nya sida gawa di menua pesisir kelebih agi di menua ulu ti mayuh pengurang ba perengka guna pemun kelimpah jauh ari pemansang.

    “Aku bebasa sereta ngenang pemanah pengawa bala pengajar ti ransing gawa, bagas sereta bisi pengeran tinggi ngajar di menua ulu taja napi mayuh pemar ketegal gaya menua.

    “Taja napi pejalai ti jauh sereta lelak nengah jalai batang, meraka sungai, niki nurun bukit enggau penanggul ke bukai, tang semua nya enda ngelemika pengeransing kita gawa ngajar bala nembiak di menua ulu,” ku Dennis rambau bejadika nutup Pengawa Lumba Sekula Primari (MSSR) Zon Ulu Baram ti diatur Sekula Primari (SK) St Pius di Long San, bedau lama.

    Pengawa nutup nya diatur di balai mayuh guna SK St Pius ke alai sekula nya udah menang trofi champion. Batang tuju lumba tu dikena milih sekula ti ngarika Ulu Baram ngagai MSSR ti diatur di Marudi dalam taun baru.

    Ku Dennis nambah, enda patut sereta salah ngumbai bala pengajar ti gawa di menua ulu semina dekaka elawin enggau insentif ti besai agi dibanding elawin ngajar di mengeri.

    “Tebal agi kita sedar sereta nemu penanggul enggau pemar ti deka ditapi kita ke ngajar di Telang Usan enggau Baram,” ku Dennis.

    Taja pia ku Dennis, semua tu dikereja laban bala pengajar bisi pengeran enggau pengeliat kelimpah sedarka pemesai guna pelajar nyadi ejen ubah enggau pemansang komuniti di kandang menua nya.

    Kelimpah ari ngajar di kelas, bala pengajar mega suah agi nyadi lalau ketuai raban bansa mantu nulis surat sereta mega pemansut penatai pemisi besai sida enggau meli produk kebun enggau asil kampung sida.

    Iya mega ngemeratka pemesai guna aktiviti ko-kurikulum enggau akademik bela sesingkang nentuka pemansang sebela ngagai bala nembiak.

    Sama bisi datai Chairman Komiti Kepala Pengajar Zon Ulu Baram Sintan Lugat, Kepala Pengajar SK St Pius Jackson Meli enggau Ketuai Kampung Long San Lucia Paya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads