DTTG ngarapka ‘Usul Pindaan’ KTS dipejurai maya DUN. - Berita Iban Online

Header Ads

  • Baru Nyadi

    DTTG ngarapka ‘Usul Pindaan’ KTS dipejurai maya DUN.

    SIBU: Dayak Think-Tank Group (DTTG) sekali agi ngandalka ‘perambu ngubah’ (Usul Pindaan) Kanun Tanah Sarawak (KTS) dibantai maya aum Kunsil Nengeri (DUN) ti deka datai.

    Penengkebang DTTG Wellie Henry Majang madah, udah maya iya pekara nya dibantai ba aum DUN dikena mutarka isu Pemakai Menua (PM) enggau Pulau Galau (PG) ti udah lama nating pengidup bansa Dayak.

    “Kitai asa amat laban maya aum DUN ngenyit diatur sebedau tu perambu nya nadai disebut.

    “Nya alai, kitai ngarapka aum nangkan ke tu ti dipelaba deka diatur bulan November perambu nya deka dibantai,” pia ku iya madah ngagai pengarang berita, kemari.

    Iya madah, pengandal gerempung sida iya tu bepun ari komiti ke ditumbuh mansik isu PMPG kala madahka diri deka mantaika asil pansik sida enda lama agi.

    Tang ku iya, nyau udah semilan bulan asil pansik nya mengkang empai ditemu kelimpah komiti tu mega mantaika pengandal diri ulih mutarka dua bengkah isu nya deka diputar dalam timpuh ke enda lama.

    “Tang kitai meda komiti tu enda mujur ngiga chara mutarka isu PMPG nyengkaum sida mega enda mujur mantaika asil pansik maya aum DUN ngenyit sebedau tu,” ku iya madah baru.

    Ukai semina nya, Wellie mega ngarapka raban pengelandik Dayak enggau gerempung ukai dikuasa perintah (NGO) bela diberi awak beratika ‘draft’ pansik komiti nya ngambi pulaika pemaik ngagai semua lebih agi ngagai bansa Dayak di Sarawak.

    “Juluk ati kitai deka meda perintah nengeri nukuka konsep PM enggau PG.

    “Kemaya hari tu, bansa Dayak ti bisi kes bekaul enggau Tanah Adat PM enggau PG mengkang mayuh alah bechara ba kort.

    “Nya alai, aum DUN serak tu nyadika pengandal ngagai kitai deka nerima berita manah ari perintah nengeri,” pia ku iya.

    Kelimpah ari nya, ku iya, DTTG baka bansa Dayak ke bukai ngandalka empat iku menteri penuh Dayak nyengkaum dua iku nyadi Sapit Kepala Menteri mujur nyumanka pengirau ati bansa Dayak ngetanka PM enggau PG. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads