Empat ribu raban bemutosikal bekuasa besai entarabansa deka begempuru di Bandaraya Kuching ujung minggu tu - Berita Iban Online

Header Ads

  • Baru Nyadi

    Empat ribu raban bemutosikal bekuasa besai entarabansa deka begempuru di Bandaraya Kuching ujung minggu tu

    ARAM SAMA NGULU PENGERAMI MUTOSIKAL BEKUASA BESAI: Abdul Karim (duduk tiga ari kanan) begambar enggau raban Pengatur pengawa gempuru raban mutosikal bekuasa besai, ITBCK di opis iya pagi tu tadi.

    KUCHING: Sebengkah agi pengerami ke nyukung industri dagang temuai menua tu deka matak urung 4,000 iku sida ke ngena mutosikal besai bekuasa tinggi deka begempuru di Bandaraya Kuching berengkah ari hari Lima ngagai hari Minggu, minggu tu.

    Atur pengawa raban mutosikal bekuasa besai tu deka digulu ulih penyereta ke bisi pengerindu ba mutosikal bekuasa besai ukai semina ari Sarawak aja tang ari Semenanjung Malaysia, Sabah, Labuan, Brunei, Indonesia, Thailand, Singapore, USA, United Kingdom, Australia, New Zealand enggau India, nyengkaum kerabat diraja ari menua tu empu.

    Menteri Dagang Temuai, Seni, Adat Pesaka, Nembiak, Lumba enggau Main (KPSKBS) Datuk Abdul Karim Rahman Hamzah madah tu siti-siti iya pengerami ke sida ke bisi pengerindu ba mutosikal bekuasa besai, pengudah atur pengawa ke sebaka digaga di Kuching, Edisi Pemungkal dalam taun 2015.

    "Atur pengawa bansa tu deka dikelai dalam kalendar dagang temuai, digaga dua taun sekali," ku Abdul Karim pengudah meda pemujur atur pengawa ke sama tu digaga dalam 2015.

    Berindik ari pemujur nya, raban pengatur atur pengawa tu, Iron Tigers Club Kuching (ITBCK) ti disukung ulih Perintah Menua Sarawak enggau KPSKBS, besetuju ngaga edisi ke-2, ke besai agi ari 2015.

    "Atur pengawa baka tu deka ngeletakka Bandaraya Kuching nyadi sebuah palan pengerami bemutosikal.

    "Enti sema, pengawa tu mujur, iya deka dipajakka tiap dua taun nyadi palan bemutosikal," ku iya.
    Iya madah munyi nya lebuh bechairmanka aum media bekait enggau gempuru tu di opis KPSKBS ditu, pagi tadi.

    Ba pengerami tu ila, Program raban bemutosikal bekuasa besai tu deka ngerintaika program baka KIBW Cowboy Ride (hari Lima 13 Okt ari pukul 2:30 ngalih hari ngagai 6 lemai) ngena mutosikal besai ngagai Pasar Lama Siniawan, KIBW City Ride (hari Enam 14 Okt ari pukul 10 pagi ngagai 12 tengahari) bepun ari laman MBKS ngagai DBKU, lalu malam nya mega bisi diatur Gala Dinner ke deka digulu ulih Tuai Pemegai Menua Tun Pehin Sri Abdul Taib Mahmud, Kepala Menteri Datuk Patinggi Abang Johari Tun Openg enggau pemesai menua bukai.

    Malam Gala nya mega deka mantaika 'Fashion Show' alai model ke mandangka baju di bai ari Ukraine, Eropah enggau USA.

    Ke pengabis matak ati bala mayuh malam nya, lima buah mutosikal bekuasa besai deka digaga nyadi chabut betuah, alai chabut betuah ke pengabis besai, iya nya motosikal Harley Davidson Sportster.

    Kena 15 Okt, hari ke penudi iya endar, raban bemutosikal tu deka ngagai pengerami nya di palan bebeli barang CityOne Rooftop, alai pengawa bejual perengka guna mutosikal bekuasa besai bisi di jual nyengkaum baju Tee, licha pasal pengelikun ngena mutosikal besai sereta 'Battle of the Bands'.

    Kelimpah ari nya, seiku orang ke bepeneleba sereta tebilang dalam pengawa 'stunt' mutosikal bekuasa besai, Aaron Twite deka mandangka 'stunt' iya berengkah ari 13-15 Okt di CityOne Rooftop (13 okt ari pukul 2:30 ngalih hari ngagai 6 lemai, 14 Okt 12 tengahari, 4 lemai enggau 6 lemai lalu hari penudi, pukul 12 tengahari, 3 lemai enggau 6 lemai.

    Mensia mayuh ke deka meda 'stunt' nya, dilalau datai bebala mayuh lalu masuk meda 'stunt' tu pechuma.

    Ba aum media di opis Abdul Karim pagi tadi, Perintah Menua nengah opis menteri nya nyuaka geran RM100,000.00 kena pengatur pengawa nya ngaga pengawa besai tu. #UtusanMalaysia

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads