Entulu enda irau ati ninga jaku selebubu. - Berita Iban Online

Header Ads

  • Baru Nyadi

    Entulu enda irau ati ninga jaku selebubu.

    KUCHING: Menteri ba Opis Menteri Besai, Datuk Joseph Entulu anak Belaun madahka iya enda irau ati pasal berita ke madahka iya dipelaba enda dipilih nyadi chalun ba Pengawa Bepilih Besai (Parlimen) ke-14 tu ila.

    Entulu lebuh dikerandau nengah ‘whatsapp’ madah, iya enda kiruh sereta enda irau ati ke jaku selebubu ti madahka Parti Rakyat Sarawak (PRS) ngenggaika iya nyadi chalun ngetanka kerusi Selangau maya PRU ke-14 tu ila.

    Iya madah munyi nya lebuh nimbal berita sereta jaku presiden PRS ti mega nyadi Sapit Kepala Menteri, Tan Sri Datuk Amar James Jemut Masing, ke nadai nyengkaum nama iya dalam lis nama chalun PRU ke-14, ke udah di anjung ngagai Kepala Menteri,Datuk Patinggi Abang Johari Tun Openg ti mega nyadi chairman Barisan Nasional (BN) sereta Menteri Besai, Datuk Seri Najib Tun Razak ti mega nyadi Presiden BN.

    “Maya PRU ke-12 suba, kenu ku jaku nama Datuk Masir Kujat pan enda disengkaum dalam lis chalun, tang udah nya, agi mih dipilih nyadi chalun BN maya nya.

    “Nya alai, aku enda irau ati tauka enggai ibuh ke jaku selebubu ti madahka diri ngenggaika aku nyadi chalun Selangau ba PRU ke-14 tu ila.

    “Aku tetap majakka pengawa aku gawa ke rayat,” ku Entulu.

    Ba sebengkah program ujung minggu tu tadi, Masing ti mega Menteri Pemansang Infrastruktur enggau Perengka Pengangkut, lebuh dikerandau pengudah bejadika atur pengawa ‘10thSarawak Amateur Masters Open Golf championship 2017 ba Kelab Golf Sarawak ditu, madahka ari enam nama lis chalun ungkup PRS, semina dua iti nama ke lalu bedau ditetapka, iya nya Lubok Antu enggau Selangau.

    Lis nama chalun bukai ke udah ditetapka ke PRS, iya nya Datuk Joseph Salang Gandum (Julau), Aaron Dagang (Kanowit), Wilson Ugak Kumbong (Hulu Rajang) enggau Datuk Masir Kujat (Sri Aman).

    Ngenang sejarah Entulu masuk politik, keterubah iya nyadi Kaban Parlimen (MP) ke Selangau, lebuh iya menang bediri atas tikit Parti Bansa Dayak Sarawak (PBDS) ba PRU ke-11, ngalahka chalun SNAP, Liman Sujang.

    Lalu nangkan nya, pengudah PBDS dikinsil (dalam taun 2004), Entulu lalu nyadi kaban parti PRS nyentuk ke diatu sereta mangku pengawa nyadi Sapit Presiden PRS.

    Ba PRU ke-12 (2008), Entulu dichalun baru ke alai iya menang darat, lalu nangkan nya iya sekali agi bediri baru ngetanka kerusi Selangau ba PRU ke-13 (2011) ke alai iya mujur ngalahka chalun Parti Keadilan Rakyat (PKR), Joshua Jabeng sereta teulihka 12,040 undi (Joshua semina bulih 3,891 undi). #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads