JBPM udah mujur meresa 14 ari 27 buah sekula Tahfiz di Sarawak. - Berita Iban Online

Header Ads

  • Baru Nyadi

    JBPM udah mujur meresa 14 ari 27 buah sekula Tahfiz di Sarawak.

    LATIH: Nor Hisham madahka chara ke betul lebuh deka nyelamat ngagai media ke bisi ngambi bagi.

    KUCHING: Opis Bomba enggau Penyelamat Malaysia (JBPM) Sarawak, naka ke diatu udah meresa 14 ari semua 27 sekula Tahfiz di Sarawak.

    Direktor JBPM Sarawak Nor Hisham Mohammad madah, pengawa meresa semua sekula Tahfiz nya dipejalaika Bomba nengah sebengkah ‘Task Force’ ke udah ditumbuhka khas meresa pengelikun palan nya di nengeri tu.

    Dua puluh tujuh (27) sekula Tahfiz di Sarawak nyengkaum di Kuching bisi 19 buah, Samarahan (3), Saratok (1) , Sibu (1) , Bintulu (1) enggau Miri bisi dua buah.

    “Kami udah numbuhka sebengkah Task Force ti bejalaika pengawa meresa baru ngagai semua 27 sekula Tahfiz di Sarawak ke bisi dalam rikod kami.

    “Nyentuk ke sehari tu (kemari), kami udah mujur meresa semilan dalam kandang menua Kuching enggau lima ba kandang menua bukai, lalu semua penyampau nya bisi 14 pengawa meresa udah dipejalaika.

    “Bepelasarka 14 pengawa meresa ke udah dipejalaika nya, bisi tiga Tahfiz ditemu bisi penanggul ba pengelikun kelebih agi bekaul enggau penusah angus. Lalu kami deka ngeluarka notis ngagai tiga Tahfiz nya,” ku iya lebuh dikerandau raban pengarang berita.

    Dulu ari nya Nor Hisham ngulu sereta bejadika pengawa nutup ‘Latihan Pengukuhan Pasukan Bomba Komuniti Media’ ba Padang Kawad BBP Tabuan Jaya ditu, kemari.

    Nitihka penerang ari Nor Hisham tiga buah sekula Tahfiz nya jai pam enggau panel, isu bekaul enggau tangga sereta naruh barang lalu nekul pejalai nuju ngagai tangga.

    “Pekara ti balat dikemeratka kami iya nya batang pekara baka patut bisi kereban ngerara api, nambahka nya patut bisi minimum dua pintu pansut, lalu lebih agi pekara ti dikemeratka kitai ba 22 buah sekula Tahfiz ke bisi nyendiaka endur bemalam, iya nya dapur enda patut begulai enggau endur diau.

    “Semua 27 sekula Tahfiz ke bisi di Sarawak udah bisi 27 kereban ngerara api. Taja pia bisi tiga buah ke nadai alternatif pintu tauka nadai minimum dua pintu pansut,” ku iya.

    Bejaku baru iya madahka Bomba mega deka beratika wayar karan ba semua 22 buah sekula Tahfiz ke bisi nyendiaka endur bemalam enggau kerejasama Giat Mara, ti deka dipejalaika ba renggat ti deka datai kelimpah ari beratka ‘lampu kecemasan’.

    Nor Hisham mega madahka Bomba udah meri licha bekaul enggau pengelikun sereta nama pekara ke patut dikereja nyema bisi penusah ngenyit nyadi ba pengemeran sekula nya, ti dipasuk 55 iku.

    “Licha renggat kedua deka diatur baru iya nya kena 12 Oktober tu ngagai pengemeran sekula Tahfiz nengeri tu lalu ba bulan November kami deka meri latih ngagai semua nembiak Tahfiz ke bemalam ba sekula bekaul enggau pengelikun,” ku iya.

    Nitih ku iya, ari penyampau semua 27 buah sekula Tahfiz bisi 23 buah kala minta lisin ari JBPM Sarawak.

    “Kami udah bejalaika pengawa meresa sereta asil iya (ari 23 sekula nya) bisi 19 buah udah diberi sukung lisin lalu empat agi bedau kala minta sukung lisin enggau bomba,” ku iya.

    Berebak enggau tu lebuh dipinta ngenang pasal program ke diatu kemari, Nor Hisham madahka tuju nya ngambika media ulih nemu nama pengawa pengelikun enggau penusah ke ditapi raban bomba maya bejalaika pengawa.

    “Tu endang program ke diperambu enggau komuniti bomba media sereta deka dipajakka,” ku iya seraya madahka mayuh perambu program ke dipejalaika enggau media jemah ila.

    Sama bisi datai ba program nya Sapit Direktor Operasyen JBPM Sarawak, Tiong Ling Hii enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads