Header Ads

  • Berita Tebaru

    KBS setuju Sarawak numbuhka sekula lumba enggau main

    Khairy (bediri) benung nyaut sekeda tanya ari bala nembiak lalu bela digulu ulih Dennis (belakang Khairy) enggau Rentap. Atur pengawa nya kemari bela digulu ulih urung seribu iku nembiak ari bemacham pupu bansa ari menua tu.
    KUCHING: Perintah Besai nengah Opis Menteri Nembiak, Lumba enggau Main (KBS) setuju Sarawak numbuhka sebuah sekula lumba enggau Main.

    Menteri opis nya, Khairy Jamaluddin madah beratika ari Lumba engga Main Malaysia (SUKMA XVIII) taun 2016 mandangka Sarawak mujur dalam lumba enggau main tu.

    "Pemujur Sarawak dalam SUKMA XVIII (2016) tu tadi mandangka bisi pemerat Sarawak ngaga sebuah sekula lumba enggau main.

    "Sarawak mega ngembuan atlet renggat dunya baka Pandelela Rinong, seiku penerejun ke pengabis nyulut di Malaysia, lalu nambah enggau nya, Sarawak ngembuan mayuh bakat lumba enggau main," ku Khairy.

    Iya madah munyi nya lebuh bejaku ba Randau TN50 Begulai enggau Khairy Jamaluddin di Dewan Lagenda, Kampung Budaya Sarawak, Santubong, semak ditu, ngalih hari tu tadi.

    Taja pia, ngaga sebuah sekula lumba enggau main enda tau enda nyengkaum Opis Menteri Pelajar Malaysia laban bisi besangkut paut enggau pelajar nembiak, ku iya.

    "Tang aku deka berandau enggau Menteri Pelajar Malaysia, Dato Sri Mahadzir Khalid bekait enggau pekara tu," ku iya.

    Dalam aum iya enggau Menteri Dagang Temuai Seni enggau Adat Pesaka, Nembiak, Lumba enggau Main Sarawak, Datuk Abdul Karim Rahman Hamzah, Perintah Menua tu enda ibuh ngaga sekula baru laban udah bisi sekula, Sekolah Demak Baru ulih di tukar nyadi sekula lumba enggau main, sereta besepiak enggau komplek lumba enggau main.

    "Sekula udah bisi, semina ngaga rumah buding aja alai penyereta diau, ngambika ulih nyadi 'residential school'," ku iya.

    Khairy nandu baru, enti sekula nya ila nyadi nyata, kurikulum data enda tau enda di ubah, nitihka kurikulum lumba enggau main Malaysia sereta enda tau enda minta saup ari servis sukung Sains, Lumba enggau Main.

    "Nyangka naka kediatu, pemerat tu agi bedau terang endar, tang nganti saut ari Opis Menteri Pelajar dulu " ku iya.

    Sama bisi enggau ngulu aum media nya kemari, Menteri Muda Nembiak, Lumba enggau Main, Datuk Snowdan Lawan, ADUN Tasik Biru, Datuk Henry Jinep, ADUN Layar, Betong , Gerald Rentap Jabu enggau ADUN Telang Usan, Dennis Ngau. #UtusanBorneo

    No comments

    Post Top Ad