Header Ads

  • Berita Tebaru

    Kemeranka idup bepengerai dikena nyeliah penyakit raya

    Majang Renggi
    BINTULU: Bala komuniti ulih nyeliahka penyakit berampit enggau enda berampit, ti enda ngaul belanja nengah pengawa ngemeranka chara idup bepengerai ba pengidup sida besehari sehari.

    Kaban Kunsil Nengeri (ADUN) Samalaju, Majang Renggi madah, ari ulah ngemeranka aktiviti fizikal abis nadai 30 minit tetiap seesi, lima hari seminggu tauka bejalai 10,000 singkang sehari.

    Pia mega ku iya, gaya atur pemakai ti meruan nyengkaum ngetu nginsap tauka ngirup ai bisa.

    “Mensia mayuh mega patut beperesa pengerai suah kelebih agi ke bisi penanggul gemuk sereta naka ulih ngulihka berat tubuh ti manah setipak enggau peninggi,” ku iya.

    Iya mansutka jaku nya lebuhka bejaku bejadika Kem Nak Sihat Renggat Pelilih Bintulu di Balai Raya BDA, Rancangan Perumahan Rakyat (RPR) Kidurong, apin lama ke udah.

    Ku Majang, wang enggau reta ti mayuh nadai guna nyema idup bepanggai ba ubat enggau perubat aja.

    Program diatur Opis Pengerai Bagi Menua Bintulu enggau kerejasama Komiti Pemansang enggau Pengelikun (JKK) RPR Kidurong diatur urung pukul 6.30 pagi nyentuk pukul 1 lemai ngaul pengawa senamrobik zumba, bejalai 10,000 singkang, pekit ngelinsu nembiak mit, pengawa beperesa pengerai nadai bebayar nyengkaum beperesa pap smear, beperesa tusu, mulut, pengawa mandangka pengerai, chabut tikit benasit enggau ke bukai.

    Ku Majang, gaya idup bepengerai patut dikemeran ari umur biak lalu apai indai meseti nyadi chunto bala anak bam pengawa tu.

    Ku iya, pangka negetif penyakit iya nya sistem pengerai mensia mayuh ti ditating belanja perubat enggau pemulai pemanah pengerai tinggi ngagai pesakit raya lalu nyema diteju pia aja, penyampau penyakit deka nambah belipat dudi hari.

    “Rampa kelinggi ti kamah, mayuh uras enggau utai ti tau nakung ai mega narit penatai gerinang, lalat, chit enggau nyamuk aedes betelu lalu mai igi penyakit,” ku iya.

    Nya alai ku iya, meri penyedar enggau pelajar ngagai bala komuniti bekaul gaya idup bepengerai dikearap mantu nyaga sida ari penyakit.

    Sama bisi datai Ketuai Raban Bansa (KK) RPR Kidurong, Ibrahim Edeni, Chairman Kawasan Rukun Tetangga (KRT) RPR Kidurong Kidurong, Mokhtar Ismail enggau Pemesai Klinik Pengerai Indai enggau Anak Kidurong.

    Berebak enggau nya, Pemesai Epidemiologi Dr Shafizah Ahmad Shafiee ngarika pemesai Bagi Menua Bintulu madah, Kem Nak Sihat nampung pejalai ‘Karnival Jelajah Sihat’ diatur dalam taun 2012.

    Iya ngarapka nengah aktiviti ke diatur deka meri penyedar ngagai bala komuniti ba pengawa nagang penyakit berampit enggau enda berampit.

    “Kami ngarap deka ulih ngatur mayuh agi aktiviti ti ngaul peranak di menua tu taun baru, nerenak penyedar gaya idup bepengerai, antara iya ngaul pekit pemakai ti bepengerai,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: