Ketuai raban bansa meseti regas ngatur pengawa. - Berita Iban Online

Header Ads

  • Baru Nyadi

    Ketuai raban bansa meseti regas ngatur pengawa.

    GAWA MEMANAH: Dr Rayong nyuaka setipikit ngagai Penghulu Nyambong Maweng seraya dikemataka Nyalau sereta Richard (kanan) ba Pengawa Nyuaka Setipikit Ketuai Raban Bansa DUN N.33 Engkilili, kemari.

    SKRANG: Ketuai raban bansa renggat baruh meseti regas agi bejalaika tanggungpengawa diri nusui sereta ngerembaika polisi perintah ti sempama pengaji ngagai sida.

    Raban sida tu nyengkaum pemancha, penghulu, kaunsilor, kapitan, tuai rumah sereta tuai genturung pendiau ke nyadi mata enggau pending perintah sereta penyambung perintah enggau rayat.

    “Nya kebuah, nama aja polisi, misyen sereta visyen perintah ke ditempa Barisan Nasional (BN) ba renggat nengeri enggau perintah besai patut ditusui magang ngambi iya ditemu raban ke diselinting,” ku Dr Rayong.

    Iya madha munyi nya rambau Pengawa Nyuaka Setipikit Ketuai Raban Bansa DUN N.33 Engkilili ba Dewan Dr Johnical Rayong Ngipa ke bela digulu Kaban Parlimen Lubuk Antu Datuk William Nyalau Badak ba Skim Skrang ditu kemari.

    Pengawa tu diatur begulai Opis Residen Sri Aman enggau Opis Kaunsil Pelilih Mit Engkilili.

    Beserimbai enggau pengawa nya bisi tiga penghulu baru udah dichiri lalu nerima setipikit diri iya nya Penghulu Nyambong Maweng, Penghulu Ahmad Suhaili enggau Penghulu Lee Chee Min @ Ah Beng.

    Nangkan nya, bisi 89 iku nerima seitipikit tuai rumah nyengkaum 37 iku ke baru dipadu nyadi tuai rumah ke sah.

    Nitihku Dr Rayong, sida ke dipadu nya patut regas bejalaika pengawa ungkup nembiak redak diri lalu besaup tulang sereta buah penemu enggau pangari rayat dalam ngemansangka DUN Engkilili ngagai tikas ke lebih tinggi.

    “Ingat, penuduk tu ukai dikena kita ngerigang diri, lawa sereta ngeninggi diri tang patut mantu aku ngemansang DUN tu...kelala penanggul rayat awak ulih dikenatai ngagai aku ke nyadi pengari rayat awak iya dibai ngagai ejensi ke bekaul,” ku iya seraya mesan bala ketuai raban bansa nya patut ngembuan telefon binching awak ngemuntangka pengawa enggau pangan diri.

    Raban sida tu mega dilalau meretika juluk Kepala Menteri Datuk Patinggi Tan Sri Abang Johari Tun Openg ti nadai bukai iya nya keran deka meda rayat nyerungkai bidang Ekonomi Digital.

    Ku iya, perintah nyelinting rayat lebih agi ba menua pesisir awak ulih nyapai penatai pemisi tinggi manggai taun 2030 enggau abis mimit RM4,000 sebulan.

    “Ku iya, aku ngarap kitai ketuai raban bansa laban ti dampih enggay rayat ulih mantu perintah nyapai visyen nya sereta meransang sida ngemansangka tanah puang laban asil iya ulih dijual nengah aplikasyen ke majak moden maya hari tu, ku iya.

    Dr Rayong mega minta bala ketuai raban bansa nyadi chunto pemadu manah sereta enda ngatika diri empu aja tang patut suah berandau enggau nembiak redak sida.

    “Anang pulai ari kebun terus bepekul dalam bilik tang patut berandau enggau sida ba ruai lalu agih mimit gaji mih dalam sebulan dikena melanja sida serayaka berandau,” ku iya.

    Sama bisi datai ngulu pengawa nya Sapit Residen Sri Aman Thomas Geoffery Kendawang, Pemesai Pelilih Richard Ngumbang, SAO Brain Munsang, Pemancha Jau Jagit enggau Pemanca Chua Chee Lung, ketuai opis perintah, ketuai parti komponen BN, penghulu sereta peranak ke besemak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads