Komiti genturung pendiau meseti chakah ngatur program: Snowdan. - Berita Iban Online

Header Ads

  • Baru Nyadi

    Komiti genturung pendiau meseti chakah ngatur program: Snowdan.

    BALAI RINGIN: Mayuh bengkah komiti ari tetiap genturung pendiau diansak ngambika chakah agi gawa ngatur program tauka aktiviti ti ulih mantu peranak di menua sida.

    Menteri Muda Nembiak enggau Lumba Datuk Snowdan Lawan nyemetak madah atur pengawa ke bansa nya endang berat bepanggai ba inisiatif bala komiti nya empu.

    “Kunchi dikena komited iya nya ngatur pengawa,” ku Snowdan rambau pengawa ngelanchar projek beripai nembuka pengawa ngaga Gerija Mit St James di Kampung Abit, Balai Ringin bedau lama.

    Ku iya nambah, ukai semina jaku sereta merambu aja deka ngatur pengawa, bala komiti mega patut ngasuh pelin nya nyadi nyata sereta minta saup iya nyema sida betapi enggau sebarang penanggul.

    “Aku mega temegah ati ngulu sereta bejadi tauka ngulu pengawa ke bansa nya,” ku Snowdan ke mega Kaban Kunsil Nengeri (ADUN) Balai Ringin.

    Ngelansa pasal chapel nya, ku Snowdan, kunteriktor deka dikaul dalam projek beripai nya dikena ngemuntang sereta ngenyampatka pengawa ngaga chapel nya.

    Ba lansa ke bukai, ku iya, sebidang tanah di Balai Ringin deka endur ngaga stadium mit baru ke disikap enggau trek lumba sereta palan pengenduh temuai dipebasa (grandstand).

    “Abis nadai sekula di kandang menua nya deka ulih ngena stadium mit endur sida bejalaika aktiviti lumba,” ku Snowdan seraya nambah, stadium mit deka nyadi peransang dikena ngangkatka Balai Ringin nyadi pelilih mit.

    Ba pengawa ngangkatka nyadi pelilih mit, ku iya, Balai Ringin deka nerima agih belanja iya empu ari perintah nengeri ti deka ngenyampatka perambu pemansang ke diatu enggau jemah ila.

    Sama bisi bejaku iya nya Chairman Komiti Projek Chapel, Billy Spencer Aling ti madahka pengawa bejalaika inisiatif ngentak chapel sida empu berengkah dalam bulan Julai 2009.

    “Kami mujur ngiga belanja ari pengawa bejualka tanah liat ti ulih ditemu di kandang ngelingi genturung kami sereta mega nerima pemeri ari mensia mayuh,” ku Billy.

    Ku iya, Kaban Parlimen (MP) Sri Aman Dato Masir Kujat mega bisi nyuaka pemeri ngagai bala komiti dikena sida ngaga perabung chapel.

    Taja pia, ramu ti ditambah iya agi di Opis Bagi Menua Serian lalu nganti diangkut ngagai genturung pendiau sida.

    Berebak enggau nya, semua penyampau RM42,000 udah disua Snowdan di baruh geran Projek Mit Pemansang Menua Pesisir (MRP) iya ngagai lima bengkah gempung di kandang menua nya dikena melanja aktiviti sida. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads