Kunteriktor ke enda nitihka standard deka diketuka servis. - Berita Iban Online

Header Ads

  • Baru Nyadi

    Kunteriktor ke enda nitihka standard deka diketuka servis.

    NAMA BERITA?: Lee ngerandau mensia mayuh ke bisi ngirup pagi di Shun Heng Food Court di Senadin Uptown, kemari, bela bisi dipeda Eric (dua kiba).

    MIRI: Kunteriktor ti enda bejalaika pengawa nitihka standard tauka spesifikasyen ke ditetap patut digantung lisin lalu servis sida deka dikinsil.

    Menteri Muda Dagang Temuai, Seni enggau Main Asal, Datuk Lee Kim Shin madah, iya nerima mayuh sebana ari mensia mayuh bekaul penanggul nebas babas, parit sebat enggau pengawa ngumpul uras kelebih agi di genturung pendiau.

    Ku iya, piak kunteriktor patut gawa ngemata kediri empu nentuka kereja digaga enggau meruan.

    “Aku merambu ngagai Majlis Bandaraya Miri (MBM) bejalaika atur terit ngagai sebarang kunteriktor ti semina ngambi nama aja gawa nyengkaum meri jaku tangkan sereta nyekat bayar nyema servis sida enda ngemuaska ati,” ku iya.

    Iya mansutka jaku nya ngagai media pengudah ngatur program bejalai begulai enggau raban gawaka Parti Sa’ati Rayat Sarawak (SUPP) Senadin di Shun Heng Food Court di Senadin Uptown, kemari.
    Sama bisi datai Ketuai Biro Aduan SUPP Senadin, Eric Chin.

    Lee ke mega Kaban Kunsil Nengeri (ADUN) Senadin nambah, antara kandang menua ti pemadu mayuh nerima sebana iya nya ari Tudan.

    Ngelansa pasal tim gawaka SUPP Senadin, ku Lee, tim nya megai tanggungpengawa mendingka penanggul ditapi rayat di sitak Senadin kelimpah mantau penanggul ke bisi nyadi.

    “Bala sida bejalai ninting minggu ngulihka timbal ari peranak,” ku iya.

    Lee ngingatka kunteriktor ti bejalaika kereja ngintu/ngemanah ngambika minta penemu tauka lalau ari piak SESCO, Telekom, Sarawak Gas enggau LAKU dikena nyeliahka sebarang penanggul ba servis.

    Belalauka penanggul bekal ai ke nyadi di kandang Permyjaya, Lutong, Senadin enggau Tudan minggu nyin tadi, Lee madah iya bepun ari piak ketiga ti bejalaika kereja ngambi sampel tanah dataika ngerusak paip baruh tanah.

    “Piak nya patut madah ngagai ejensi bekaul sebedau ngaga kereja ngebuk tanah dikena nyeliahka penanggul ti enda patut nyadi.

    “Sida patut megai tanggungpengawa sereta nerima atur terit nyengkaum mayar ungkus ngemanahka perengka guna ti rusak,” ku Lee. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads