Header Ads

  • Berita Tebaru

    KWIS patut chakah ngaga produk dagang eksport

    BEKUNSI PENEMU: Romeo (tengah) maya nyambut penatai KWIS ngagai opis iya ditu, empai lama tu tadi.
    SIBU: Raban Kelab Wanita Ikhtiar Sibu (KWIS) dipinta berundingka chara dikena ngaga produk ti ngembuan pengelebih deka laku dijual nyengkaum ulih dieksport ngagai menua bukai.

    Ba penemu Sekretari Politik Kepala Menteri Romeo Christopher Tegong, KWIS mega tau ngelakuka produk sida ngena servis e-dagang ti dipeda engkeman agi dikena maya hari tu.

    Iya mantaika jaku nya maya nyambut penatai raban komiti KWIS ngagai opis iya ditu, empai lama tu tadi.

    Penatai sida tu betuaika presiden baru gerempung sida iya nya Haptiah Bairi.

    “Nyangka ba singkang keterubah sida tau belabuh berundingka nama produk ke ulih digaga sida tang ngena puku ti mit ti mega tau digaga ba rumah.

    “Taja pan baka nya, produk ke digaga nya meseti ditemu deka laku dijual.

    “Kelimpah ari nya, sida tau bekenaka chara e-dagang ngelakuka produk sida laban tu ukai semina ngenyadika puku tang deka mai penguntung ke manah,” pia ku iya madah.

    Nangkan nya, ku Romeo, enti produk udah ditemu orang sereta nerima peminta ke mayuh, sida meseti ransing deka nambahka penyampau produk sida.

    “Enti produk udah laku, orang ke gawa ngasilka produk mega meseti mayuh laban ukai semina ngira penyampau produk tang mega berundingka tikas pemanah produk.

    “Ari nya, dagang kita deka entap sereta semampai laku dibeli orang,” ku iya madah baru.

    Ba pekara bukai, Romeo maya tu ngelalau bala raban gerempung nya semampai ngintu sereta nyaga kaul antara pangan diri.

    Berebak enggau penatai sida, gerempung tu bisi mantai kereta kereja sida bekaul enggau program ‘Gempuru Orang Dagang beserimbai enggau Penumbuh Ke-20 Amanah Ikhtiar Malaysia (AIM) Sarawak 2017’ ti dilanggur deka diatur bulan Disember tu ngagai Romeo.

    Naka ke diatu gerempung nya udah bisi 1,967 iku raban. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: