Header Ads

  • Berita Tebaru

    Lebih 25 antu pala ba Muzium Lama dipindah ngagai palan sementara

    ADAT: Lemambang Lanting nguluka pengawa Miring Antu Pala di Kuching kemari.
    KUCHING: Lebih 25 igi antu pala ke dipandang ba galeri begunan Muzium Lama ‘Etnologi’ Kuching dipindah ngagai palan bukai ungkup timpuh sementara.

    Pengawa nya dikena meri awak ngagai kereja ngangkatmanah begunan muzium ke disadang begunaka timpuh dua taun.

    Sebedau dipindah, bisi di-pejalaika atur pengawa Miring diuluka Lemambang Lanting anak Itar ba galeri nya.

    Nitihka penerang ari Direktor Opis Muzium Sarawak Ipoi Datan, pengawa miring dikemujur raban ari Majlis Adat Istiadat Sarawak.

    “Kitai meseti ngereja pengawa miring sebedau tau mindahka antu pala ngagai palan bukai.

    “Tu diadu nitihka adat Iban ke alai sebarang pengawa mindahka antu pala meseti dipunka enggau pengawa miring,” ku Ipoi bejaku ngagai pemberita.

    Ipoi nambah, semua antu pala ke dipandang di galeri muzium nya disimpan kenyau ari jeman Rajah Brooke.

    Ku iya, antu pala nya deka dipindah pengudah tiga hari ari pengawa miring lalu disimpan ba endur sementara.

    “Kitai nyadang kereja ngangkatmanah begunan muzium lama tu begunaka timpuh 2 taun.

    “Antu pala tu ulih dipeda baru ba pengujung taun 2019 tauka ba pun taun 2020,” ku iya.

    Tajapia ku Ipoi, semua antu pala nya engka deka dipandangka ba Begunan Muzium ke baru.

    Pengawa Miring Antu Pala kemari bela dikemata raban orang ke ngembuan pengerindu ba pekara adat sereta bala temuai ari menua luar.

    Begunan Muzium Lama ‘Etnologi’ Kuching berengkah ditutup 23 Oktober 2017. #UtusanBorneo

    No comments

    Post Top Ad