Lumba ulih ngedutka kaul entara komuniti, sekula. - Berita Iban Online

Header Ads

  • Baru Nyadi

    Lumba ulih ngedutka kaul entara komuniti, sekula.

    KE PENGINGAT: Nelson Gara Taka (empat kanan) nyuaka tepa ngagai Francis (tiga kiba) seraya Sarap (dua kanan) sereta bala bukai ngemata.

    SRI AMAN: Polisi Opis Menteri Pelajar Malaysia (KPM) ti netapka tetiap iku nembiak nyereta abis nadai siti aktiviti lumba enggau main di sekula ukai semina ulih mulaika baru pengerichah lumba di sekula tang mega ngedutka agi kaul raban sekula enggau komuniti di menua nya, kelebih agi apai enggau indai.

    Menteri Muda Pengelantang Komuniti Sarawak Datuk Francis Harden Hollis madah, nya kebuah Opis Menteri Pelajar Malaysia sebedau tu udah ngadaka Polisi ‘1Murid 1Sukan’ (1M1S) nyadi siti ari pengawa ti engkeman dikena nyapai juluk nya.

    Harden ke mega Kaban Kunsil Nengeri (ADUN) Simanggang mansutka jaku nya lebuhka bejaku bejadika Program Merarau nyerumba Hari Lumba Rama Nembiak enggau Gerempung Apai Indai enggau Pengajar (PIBG) Sekula Primari (SK) Saint Luke, Sri Aman bepalan di balai sekula nya, semak ditu.

    Kelimpah ari nya ku iya, aktiviti lumba enggau main mega ulih nerenakka penyerakup pupu bansa di Malaysia.

    “Penyerakup nyadi kunchi pemujur Malaysia dataika dikelala di renggat antarabansa. Runding ke ulih bekerejasama sereta bebatak asur beguna endar ba pengawa ngemujurka aktiviti lumba enggau main.

    “Nya alai aku meransang semua apai indai tauka sida ti ngibun nembiak meri sukung tegap ngagai semua pengajar di sekula ngemujurka semua aktiviti ti diperambu sida laban semua tu pulaika pemaik bala anak kita,” ku iya nyemetak.

    Ku iya, kerejasama ke bansa nya deka mai sekula ngulihka penyulut akademik enggau kokurikulum.
    “Udah tentu kerejasama ke bansa tu deka seruran bisi lalu pulaika pemaik bala anak diajar kita.

    “Kitai ngarapka nengah atur lumba rama, apai indai enggau bala nembiak ulih nempa atlit ti ulih besemekih di renggat lumba menua tu kelebih agi renggat antarabansa,” ku iya nerang.

    Tambah iya, perintah nemu, lumba enggau pengidup enda ulih diselara. Sida ti ngemeratka lumba iya nya sida ti nemu reti pengidup ke bendar.

    “Ari ngaul diri ba lumba, kitai deka bepengerai, regas sereta kering. Gaya pengidup tu meseti diterenak di renggat sekula lalu tentu piak sekula piak ti ngemai bala nembiak rinduka lumba.

    “Ulah ngemeranka pengawa lumba deka nagang bala nembiak ari tepejuh ngereja ulah enda menuku. Chakah ngaul diri ba lumba ulih ngemansangka modal mensia ti bisi kualiti sereta mensia ngembuan runding kelas satu ti nyadi ketuai megai menua dudi hari.

    “Pia mega, aktiviti lumba tu ulih nempa bala nembiak ti bepengerai batang tubuh sereta rundingt ti regas mega,” ku iya nerang.

    Sama bisi datai rambau program nya Venerable Archdeacon Father Chimbi Bunsi, Father Jackson Jarau Unggin, Father Elvis Tan enggau Father Andrew Bonny Duang ari Gerija Saint Luke, Sri Aman, Chairman Komiti Ngatur Pengawa Sekula, Sarap Bada, Kepala Pengajar Nelson Gara Taka sereta bala bukai.

    Berebak enggau nya, Harden mega bisi ngemendarka agih belanja ungkup taun 2018 bela penyampau RM15,000 ngagai Komiti Ngatur Pengawa Saint Luke enggau SK Saint Luke dikena melanja aktiviti sepanjai taun sida. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads