Masing dekaka bisi indu nyadi MP ari PRS sebedau pinchin. - Berita Iban Online

Header Ads

  • Baru Nyadi

    Masing dekaka bisi indu nyadi MP ari PRS sebedau pinchin.

    KUCHING: Sapit Kepala Menteri Tan Sri Dr James Jemut Masing deka meda indu bansa Dayak dipilih nyadi Kaban Parlimen nengah tikit Parti Rakyat Sarawak (PRS) sebedau iya pinchin.

    “Aku udah milih Dato Sri Doris Brodie (indu bansa Dayak) nyadi senator lalu udah nya nyadi indu Dayak keterubah nyadi Sapit Speaker di Dewan Negara. Sebedau aku pinchin, aku deka meda indu bansa Dayak dipilih nyadi pengari ari PRS,” ku iya.

    “Aku majak tuai, nya alai orang biak meseti diangkat lalu pia mega PRS. Pengawa negika Sarawak enggau komiti meseti seruran bisi,” ku iya madah ngagai The Borneo Post.

    Ku iya, Menteri Besai Datuk Seri Mohd Najib Razak bedau lama ke udah dekaka 30 peratus indu diambi gawa megai kuasa ba Kompeni Bekaul Perintah(GLC) sereta ba bidang ke bukai.

    “Dalam bidang (dunya politik) tu, bansa Dayak enda entu mujur. Kitai tu nadai nenama !” ku iya nyemetak.

    Bekaul ripot ti madahka iya ngenggaika Sapit Presiden PRS, Datuk Joseph Entulu Belaun dipilih baru maya Pengawa Bepilih Besai Ke-14 (PRU14), ku Masing “Aku nadai nyebut Sikie enggau Gira enda nyukung Entulu. Sida semina madah, sida dekaka orang baru,” ku iya nerang belalauka Kaban Kunsil Nengeri (ADUN) Kakus John Sikie Tayai enggau ADUN Tamin Christopher Gira.

    “Ku aku, aku bedau nerima surat sukung ngagai Joseph Entulu ngambi dichalunka baru ari sida di Selangau.

    Protal online udah ngerembaika berita ke alai tiga penggal MP Selangau deka ditingkil maya PRU tu ila pengudah enda mujur ngulihka sukung ADUN dalam sitak parlimen iya.

    Pengari PRS ke bukai ti deka nerima nasit ke sama, dua penggal MP Lubok Antu, William Nyalau Badak.

    Iya dipelaba deka meri jalai ngagai indu keterubah PRS nyadi MP, lalu semua kelai nya nguing ngagai Ketuai Indu PRS, Dato Sri Doris Brodie. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads